2026 ވަނަ އަހަރުގެ ކުރިން ރާއްޖޭގެ ހުރިހާ ރަށެއްގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމް ހިދުމަތްދޭން އެއްބަސްވުމެއްގައި ސޮއިކޮށްފި އެވެ.

މި ސަރުކާރުގެ ބޮޑު މަޝްރޫއުގައި ސޮއި ކުރުމަށް މިއަދު ރައީސް އޮފީހުގައި ވަނީ އެ ކަމަށް ޚާއްސަކޮށް ރަސްމިއްޔާތެއް ބާއްވާފަ އެވެ.

އެ ޚިދުމަތް ފޯރުކޮށްދިނުމަށް ބީއެމްއެލާއި އިކޮނޮމިކް މިނިސްޓްރީއާ އެއްކޮށް އެއްބަސްވުމެއްގައި ސޮއިކޮށްފައިވެ އެވެ. މިގޮތުން، އެއްބަސްވުމުގައި ސޮއިކުރެއްވީ ބީއެމްއެލްގެ މެނޭޖިން ޑިރެކްޓަރު މުހައްމަދު ޝަރީފާއި އިކޮނޮމިކް މިނިސްޓަރު މުޙައްމަދު ސައީދެވެ.

ބީއެމްއެލްގެ ސީއީއޯ ޝަރީފް ވިދާޅުވީ މި މަޝްރޫއު ކާމިޔާބުކުރުމަށް މި އަންނަ އަހަރު ނިމެންވާއިރަށް ހުރިހާ ރަށެއްގައި އޭޓީއެމްތައް ގާއިމުކުރެވޭނެ ކަމަށެވެ. މި މަޝްރޫއަކީ ހުރިހާ ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ބީއެމްއެލުން ކުރަމުން އަންނަ މަސައްކަތެއްކަމަށްވެސް އޭނާ ވިދާޅުވި އެވެ.

މި މަޝްރޫއުގެ ދަށުން ބީއެމްއެލްއިން ގާއިމުކުރި 150 ވަނަ އޭޓީއެމް މިއަދު ވަނީ އދ. އޮމަދޫގައި ހުޅުވާފަ އެވެ.

މި ހަފްލާގައި ވަނީ ރާއްޖޭގައި މީހުން ދިރިއުޅޭ 19 ރަށެއްގައި މޯލްޑިވްސް އިސްލާމިކް ބޭންކުގެ އޭޓީއެމް ބެހެއްޓުމަށްވެސް ސޮއިކޮށްފަ އެވެ.