ގޭންގްތަކާއި މަސްތުވާތަކެތީގެ އައްޑާގެ ގޮތުގައި ބޭނުންކުރާ ތަންތަން ދައުލަތަށް ނަގާނެ ކަމުގެ އިންޒާރު ހޯމް މިނިސްޓަރު އަލީ އިހުސާން ދެއްވައިފި އެވެ.

އިހުސާން މިހެން ވިދާޅުވީ ރޭ ހުޅުމާލެ ދެވަނަ ފިޔަވަހީގެ ހިޔާ ޓަވަރު ނުވައެއްގައި ރަހީނުކޮށްފައި ހުރި މީހަކު ފުލުހުން ސަލަމާތްކުރުމަށް ހިންގި އޮޕަރޭޝަނަށްފަހު މީޑިއާއަށް ދެއްވި އިންޓަވިއުއެއްގަ އެވެ.

އިހުސާން ވިދާޅުވީ އެފަދަ ކަންކަމަށް ބޭނުންކުރާ ތަންތަނާއި ފްލެޓްތައް ނެގުމަށް ގާނޫނަށް ގެންނަންޖެހޭ ބަދަލު ގެނެސްގެ އެކަން ކުރައްވާނެކަމަށެވެ.

ރޭގެ ހާދިސާއާއި ގުޅޭގޮތުން މިނިސްޓަރު އިހުސާން ވިދާޅުވީ، ރޭ އިރާކޮޅު މީހަކު ރަހީނުކޮށްގެން އުޅޭ ކަމަށް އިންޓެލިޖެންސްއަށް މައުލޫމާތު ލިބުމާއެކު، ފުލުހުން ހިންގި އޮޕަރޭޝަންގައި ރަހީނުކޮށްފައިހުރި މީހާ ސަލާމަތްކޮށްފައިވާ ކަމަށެވެ.

އެފަދަ ކަންކަން ކުރުން ހުއްޓާލުމަށް ގޭންގުތަކަށް އިހުސާން ވަނީ ގޮވާލައްވާފަ އެވެ. އެފަދަ ކުށްތައް ކުރާ ފަރާތްތަކަށް ގާނޫނުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅުއްވާނެ ކަމަށް އޭނާ ވިދާޅުވި އެވެ.

އިހްސާން ވިދާޅުވީ ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ފާހަގަކުރެވޭ ކަމަށެވެ.

އެހެންކަމުން، މިއަދުން ފެށިގެން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އާއެކު އެ ފުލެޓުތަކުގެ ވެރިންނާ ވާހަކަދެއްކުމުގެ މަސައްކަތް ފައްޓަވާނެ ކަމަށާ އަދި ކުށްކުރުމުގެ މާހައުލަށް އެތަންތަން ތަކުރާރުކޮށް ހުޅުވާލާފައި އޮންނަނަމަ އެ ތަންތަން އަނބުރާ ދައުލަތަށް ނެގޭނެ ގޮތެއް ހޯދާނެ ކަމަށެވެ.