އައްޑޫ ސިޓީގައި ދަންޖެހިފައި ހުއްޓާ ފެނުނު އުމުރުން 19 އަހަރުގެ ޒުވާނާ ދަންޖައްސާފައި ހުރިކަމަށް ތުހުމަތުކުރަން ފަށައިފި އެވެ.

އިއްޔެ ހެނދުނު އޭނާ ދަންޖެހިފައި ހުއްޓާ ފެނިފައިވަނީ އައްޑޫ ގަޑުކެނޑި ކޯޒްވޭ ބްރިޖްގައި އެވެ.

އޭނާގެ މަރާ ގުޅޭގޮތުން އެކި ފަރާތްތަކުން އޭނާ އަމިއްލައަށް ދަން ޖެހުނީ ނޫންކަމަށް ދަނީ ބުނަމުންނެވެ. އެގޮތުން އޭނާ ދަންޖައްސާފައި ހުރިކަމަށް ވަނީ ތުހުމަތުކޮށްފަ އެވެ.

ނަން ހާމަނުކުރުމަށް އެދި "ހުރިހާ" އާއި ވާހަކަ ދެއްކި މީހަކު ބުނީ އެ ޒުވާނާ ދަންޖައްސާ މަރާލާފައިވާކަމަށް ރަށުތެރޭގައި ވާހަކަ ދެކެވޭ ކަމަށެވެ. އަދި އެކަން ކޮށްފައިވަނީ އައްޑޫގައި ހަރަކާތްތެރިވާ ގޭންގަކުން ކަމަށްވެސް ތުހުމަތުކުރާކަމަށް އޭނާ ބުންޏެވެ.

އެ ޒުވާނާގެ މަރާއި ގުޅޭގޮތުން ބައެއް މީހުން ވަނީ ސޯޝަލް މީޑިއާގައިވެސް މިފަދަ ތުހުމަތުތަކެއް ކޮށްފަ އެވެ.

ނަމަވެސް ފުލުހުން މި ތުހުމަތުތައް ދޮގުކުރެ އެވެ. ފުލުހުން ބުނެފައިވަނީ އެ ޒުވާނާގެ މަރާގުޅޭގޮތުން ދެކެވޭ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށެވެ.

ގޮތް ނޭނގޭ މަރުތައް ރާއްޖޭގައި އިތުރުވެފައިވާއިރު، މިފަދަ މަރުތަކުގެ ހަގީގަތް ހޯދުމުގައި ދިވެހި ފުލުހުންވަނީ ނުކުޅެދިފަ އެވެ. ގިނަ ފަހަރު ފުރިހަމަ ތަހުގީގަކާއި ނުލާ ފުލުހުން މިފަދަ މަރުތަކުގައި ވަކިގޮތެއް ނިންމާ އުސޫލުން މި މަރާއި ގުޅޭގޮތުންވެސް ނިންމާފައިވަނީ އެ ޒުވާނާ އަމިއްލައަށް މަރުވީ ކަމަށެވެ.

ފާހަގަކޮށްލެވޭ ގޮތުގައި މި ފަހުން ހިނގާދިޔަ އެއްވެސް ގޮތްނޭނގޭ މަރެއްގެ ތަފްސީލް ފުލުހުން ހާމަކޮށްފައި ނުވެ އެވެ. އަދި އެ މަރުތަކުގެ ސަބަބުވެސް ހޯދިފައިނުވެ އެވެ.

އެގޮތުން ފާއިތުވި ސެޕްޓެމްބަރު މަހު އެކަނިވެސް ގޮތް ނޭނގޭ ތިން މަރު ވަނީ ފެންމަތިވެފަ އެވެ. އޭގެތެރޭގައި ނ.ހޮޅުދޫ ގެއެއްގެ ތެރޭގައި މަރުވެފައިއޮތް ޒަކިއްޔާ މޫސާއާއި ކުޅުދުއްފުށީ ފަޅުތެރޭގައި މަރުވެފައި އޮއްވާ ފެނުނު މުހައްމަދު ހަސަންގެ މައްސަލަ ފާހަގަކޮށްލެވެ އެވެ. މީގެ އިތުރުން ޖަލުގައި އަމިއްލަ އަށް ދަންޖެހި މަރުވި ކަމަށް ބުނާ އާދަމް އަތުހަރުގެ މައްސަލައިގައިވެސް ފުލުހުންގެ މައްޗަށް ތުހުމަތުތަކެއް ކުރެވުނެވެ.

މީގެ އިތުރުން ކ. ހުވަފެންފުށީގެ ދެކުނުން ހިއްކާފައި އޮތް ފަސްގަނޑަށް ދަތުރު ގޮސް އުޅެނިކޮށް 29 އޮގަސްޓުން ފެށިގެން ގެއްލިފައިވާ ތަސްލީމް މުހައްމަދު އަށް ވީގޮތް އަދިވެސް ފުލުހުންނަށް ހޯދިފައިނުވެ އެވެ.