ގިނަ ގޮންޖެހުންތަކަކަށްފަހު އެންމެ ފަހުން ކަންގަނާ ރަނޯޓް ފުރަތަމަ ޑައިރެކްޓްކުރާ ފިލްމު "އެމަޖެންސީ" ރިލީޒް ކުރާ ދުވަސް އާއްމުކޮށް އިއުލާން ކޮށްފި އެވެ.

ކަންގަނާގެ ސޯޝަލް މީޑިއާގައި އެ ފިލްމުގެ ޕޯސްޓަރަކާއެކު ބުނެފައިވަނީ "އެމަޖެންސީ" ސިނަމާ ތަކަށް އަންނާނީ އަންނަ އަހަރުގެ ޖެނުއަރީ މަހުގެ 17 ވަނަ ދުވަހު ކަމަށެވެ.

މިއީ އެ ފިލްމު ރިލީޒް ކުރަން އިއުލާން ކުރެވުނު ދެވަނަ ފަހަރެވެ. އެންމެ ފުރަތަމަ އެ ފިލްމު ރިލީޒް ކުރަން އޮތީ މިދިޔަ ސެޕްޓެމްބަރު މަހު އެވެ.

އެހެން ނަމަވެސް އިންޑިއާގެ ސެންސަރު ބޯޑުގެ ސެޓްފިކެޓް ނުލިބުމުން ރޭވިފައިވާ ދުވަހަށް އެ ފިލްމު ރިލީޒް ނުކުރެވި ދިގުލައިގެން ދިޔައީ އެވެ.

އިންޑިއާގެ ކުރީގެ ބޮޑު ވަޒީރު އިންދިރާ ގާންދީގެ ހަޔާތުގެ މައްޗަށް ހަދާފައިވާ އެ ފިލްމު އަޅުވަން ހުއްދަ ދީފައި ވަނީ ބައެއް މަންޒަރުތަކާއި އަޑުތައް ސެންސަރު ބޯޑުން ބޭނުންވި ގޮތަށް ބަދަލު ކުރުމުންނެވެ.

"އެމަޖެންސީ"ގެ ލީޑު ކެރެކްޓަރު ކަމަށްވާ އިންދިރާ ގާންދީގެ ރޯލުން ފެނިގެންދާނީ ވެސް އިންޑިއާގެ މަޖިލިސް މެމްބަރުކަން ކުރަމުން އަންނަ ކަންގަނާ ރަނޯޓް އެވެ.