ހުޅުމާލޭގައި ތޫނު އެއްޗަކުން ފުލުހަކަށް ހަމަލާދޭން އުޅުނު މީހަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލް ވިދާޅުވީ އެ މައްސަލައިގައި މިއަދު އިރުއޮއްސި 6:30 ހާއިރު ހައްޔަރުކުރީ އުމުރުން 33 އަހަރުގެ ދިވެހި ފިރިހެނެއް ކަމަށެވެ.

އޮފިޝަލް ވިދާޅުވީ ފުލުހުން އެމީހާ ހިފަހައްޓަން ދިޔައީ މީހަކަށް ތޫނުއެއްޗަކުން ހަމަލާދޭން އުޅުމުން ކަމަށެވެ.

"އެވަގުތު އެމީހާ ހުއްޓުވަން އުޅުނު ފުލުހަކަށް ވެސް ތޫނު އެއްޗެއް ބޭނުންކޮށްގެން ހަމަލާ ދޭން މަސައްކަތް ކޮށްފައިވޭ،" އޮފިޝަލް ވިދާޅުވި އެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. އެ މީހާ ހިފަހައްޓައިގެން އުޅޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފަ އެވެ. އެ ވީޑިއޯއިން ފެންނަގޮތުގައި އެ މީހާ ހިފަހައްޓައިގެން ތިބީ ދެ ފުލުހެކެވެ.