ހައުސިން ޑިވަލޮޕްމެންޓް ކޯޕަރޭޝަން، އެޗްޑީސީން ހުޅުމާލެ މަގުތަކުގައި ބަހައްޓާ މޮނިއުމަންޓްތައް ޑިޒައިން ކުރުމަށް ހުޅުވާލައި، 100،000 ރުފިޔާ ލިބޭ މުބާރާތަށް ހުށަހެޅި ޑިޒައިންތައް އިވަލުއޭޝަނަކާއި ނުލާ އެންމެ މޮޅު ޑިޒައިން ހޮވައިފި އެވެ.

ހުޅުމާލޭގެ މަގުތައް ޒީނަތްތެރި ކުރުމަށް، ހުޅުމާލޭގެ 17 ސަރަހައްދެއްގައި އެޗްޑީސީ އިން ބަހައްޓާ މޮނިއުމަންޓްތައް ޑިޒައިންކުރުމުގެ ފުރުސަތު ހުޅުވާލީ ސެޕްޓެމްބަރު 25 ވަނަ ދުވަހު އެވެ.

މުބާރާތުގެ އެންމެ މޮޅު ޑިޒައިން މިއަދު އެ ކުންފުނިން އިއުލާން ކޮށްފައިވާއިރު، މުބާރާތް ކާމިޔާބު ކޮށްފައިވަނީ "ޓީމް އާކޯސް" އިންނެވެ.

މުބާރާތަށް ހުޅުވާލަމުން އެޗްޑީސީން ބުނެފައިވަނީ މޮނިއުމަންޓް ޑިޒަންއިންކުރުމުގެ މުބާރާތަކީ، ދިވެހި ފަންނުވެރިންގެ ބައިވެރިވުމާއެކު، ”ދިވެހިންގެރާއްޖެ“ ތީމްއާ ގުޅޭ ގޮތަށް، ރާއްޖޭގެ ސަގާފަތާއި، އިސްލާމީ ތާރީހު އަދި ދިވެހިންގެ އާދަކާދަ ރަމްޒުކޮށްދޭ ބިނާތަކެއް ހުޅުމާލޭގެ އެކި ސަރަހައްދުތަކުގައި ބެހެއްޓުމުގެ މަގުސަދުގައި ކުރިޔަށް ގެންދާ މުބާރާތެއްކަމަށެވެ.

ނަމަވެސް އެއްވަނަ އަށް ހޮވުނު ޑިޒައިނުން ދިވެހި ސަގާފަތާއި ތާރީހު މާބޮޑަށް ރަމްޒުކޮށްދީފައިވާތަނެއް ނުފެނެ އެވެ. ބައެއް ފަރާތްތަކުން ދަނީ އެއީ ހަމައެކަނި އާޓިފިޝަލް އިންޓަލިޖެންސް ބޭނުންކޮށްގެން އުފައްދާފައިވާ ޑިޒައިނެއްކަމަށް ތުހުމަތުކުރަމުންނެވެ.

އެނގިފައިވާ ގޮތުގައި މުބާރާތަށް ހުށަހަޅާފައިވާ ޑިޒައިންތައް އެ ކުންފުނީގެ މެނޭޖިން ޑިރެކްޓަރު ފަޒުލް ރަޝީދަށް ހުށަހެޅުމުން އެންމެ މޮޅު ޑިޒައިން ހޮއްވެވީ ފަޒުލް އެވެ. އެންމެ މޮޅު ޑިޒައިން އަކަށް ހޮވާފައިވަނީ އިމިގްރޭޝަންގެ ކޮންޓްރޯލާ ޝަމްއާން ވަހީދުގެ ކޮއްކޮ ޝައިމާން ވަހީދު އާއި އިބްރާހިމް އިފާޒް ހުށަހެޅި ޑިޒައިންނެވެ.