ގާނޫނުއަސާސީއަށް ގެނައި އިސްލާހާއެކު 30 އަހަރު ފަހަތަށް ރާއްޖެ ގޮސްފައިވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ޕީއެންއެފް އިން މިރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ ގާނޫނު އަސާސީ އޮޅާލައި އޭގައި ހުރި ރައްޔިތުންގެ ބާރުތައް ރައީސުލްޖުމްހޫރިއްޔާގެ އަތްޕުޅަށް މިހާރު ދީފައިވާ ކަމަށެވެ. އެހެންކަމުން ސަރުކާރު ޖަވާބުދާރީ ކުރުވަން ރައްޔިތުންނަށް ފަސޭހަ ނުވާނެ ކަމަށް އެމަނިކުފާނު ވިދާޅުވި އެވެ.

ޔާމީން ވިދާޅުވީ ޑިމޮކްރެސީގެ މަގުގައި ދިވެހީން ކުރި ޖިހާދުގައި އެންމެ ބޮޑަށް ވަކާލާތު ކުރި މީހުން މިއަދު މަންމަން ވެއްޖެ ކަމަށެވެ. އަދި ވެރިކަން ދިފާއުކުރުމަށް ގާނޫނުތަކަށް އިސްލާހު ގެނެސް ކޯޓުތައް ގަޔަށް ހެޔޮވަރު މަންޒަރު މިއަދު ފެންނަމުންދާކަން ފާހަގަކުރައްވައި އެމަނިކުފާނު ވިދާޅުވީ ތާއަބަދު ވެރިކަމުގައި ނުތިބެވޭނެކަން ވިސްނަންޖެހޭ ކަމަށެވެ.

"ގާނޫނު އަސާސީގައި ހުރި ހުރިހާ އުސޫލުތަކެއް އަމިއްލަފުޅަށް އަމިއްލަ ގަޔަށް ހެޔޮވަރުވާ ވަރަށް ގަމީސް ފަހަަން ކޯޓު ފަހަން ނޫޅުއްވާށޭ. އަބަދު އެއް ބަޔަކު ވެރިކަމުގައި ތިބޭނެ ކަމަށް ނުވަތަ އަބަދު އެ ބޭފުޅުންގެ މަސްލަހަތު ހިމާޔަތްކުރެވޭނެ ކަމަށް ހީކުރުމަކީ ހަމަ ގޯހެއް،" ޔާމީން ވިދާޅުވި އެވެ.