ލިމިޓެއް ނެތް ފައިބާ ހޯމް ބްރޯޑްބޭންޑް އިންޓަނެޓް ޕެކޭޖްތައް ދިރާގުން ލޯންޗުކޮށްފި އެވެ.

މިއީ ރާއްޖޭގައި މިފަދަ ޕެކޭޖްތަކެއް ލޯންޗްކުރި ފުރަތަމަ ފަހަރެވެ.

މިރޭ ދިރާގު ހެޑް އޮފީހުގައި ބޭއްވި ހާއްސަ ރަސްމިއްޔާތެއްގައި ދިރާގުގެ ޗީފް ކޮމާޝަލް އޮފިސަރު އަލީ ރިޔާޒް ވިދާޅުވީ ދިރާގަކީ ކަސްޓަމަރުންގެ ބޭނުންތައް ދެނެގަނެ، އެކަންތައްތައް ފުރިހަމަކޮށް ދޭން މަސައްކަތްކުރާ ކުންފުންޏެއް ކަމަށެވެ.

އޭނާ ވިދާޅުވީ އެ ކުންފުނިން މިހާރު ވެސް ބޮޑު ހޭދައެއް ކޮށްގެން ކަސްޓަމަރުންނަށް ދެމުންދާ ހިދުމަތްތައް ފުރިހަމަ ކުރަން ބޮޑެތި އިންވެސްޓްމަންޓްތައް ކޮޮށްފައިވާ ކަމަށެވެ. އަދި މިރޭ ތައާރަފްކުރާ ޕެކޭޖުތަކަކީ ކަސްޓަމަރުންގެ ޑިމާންޑުތަކަށް އެކަށީގެންވާ ހިދުމަތެއް ފޯރުކޮށްދިނުމުގެ ގޮތުން ތައާރަފްކުރާ، ސްޓްރީމިން ތަޖުރިބާތައް އިތުރަށް ފުރިހަމަކޮށްދޭނެ ހިދުމަތެއް ކަމަށް އޭނާ ވިދާޅުވި އެވެ.

ދިރާގުން މިރޭ ލޯންޗުކުރީ އެއްވެސް ލިމިޓެއް ނެތި އިންޓަނެޓް ހަލުވި ސްޕީޑުގައި ބޭނުން ކުރެވޭނެ ޕެކޭޖުތަކެކެވެ. މި ޕެކޭޖުތައް އެކްޓިވޭޓް ކުރުމުން އެއް ސްޕީޑެއްގައި މުޅި މަހު އިންޓަނެޓް ލިބޭނެ އެވެ. މީގެ ކުރިން ލިބެން ހުންނަ "އަންލިމިޓަޑް" ޕެކޭޖުތަކަކީ ކޮންމެ މަހަކަށް ވަކި އަދަދެއްގެ ޑޭޓާ ލިބޭ އަދި އެ ޑޭޓާ ބޭނުންކޮށް ނިމުމުން ސްޕީޑް ދަށްވާ ޕެކޭޖުތަކެކެވެ.

ދިރާގުން މިރޭ ތައާރަފް ކުރީ ލިމިޓެއް ނެތް 1 ޖީބީޕީއެސް އާއި ލިމިޓެއް ނެތް 400 އެމްބީޕީއެސް އާއި ލިމިޓެއް ނެތް 100 އެމްބީޕީއެސްގެ އިތުރުން ލިމިޓެއް ނެތް 30 އެމްބީޕީއެސް އަދި ލިމިޓެއް ނެތް 20 އެމްބީޕީއެސް އެވެ.