އިދިކޮޅު އެމްޑީޕީގެ ހޯރަފުށީ ދާއިރާގެ ނައިބު ރައީސް ހުސައިން ޝާފިއު އެކްސްގައި "ކައްޒާބު" އަށް ގޮވުމާއި ގުޅިގެން ފުލުހަށް ހާޒިރުކޮށްފި އެވެ.

އޭނާ ފުލުހަށް ހާޒިރުވުމަށް ޗިޓް ފޮނުވާފައިވަނީ އިއްޔެ އެވެ.

ފުލުހުން ބުނެފައިވަނީ އޭނާ ހާޒިރު ކުރަނީ ސިނގިރޭޓް ފޮއްޓެއް 270 ރުފިޔާއަށް ގަންނަން ޖެހުމުން ހިތްހަމަ ނުޖެހިގެން ނޮވެމްބަރު 8 ވަނަ ދުވަހު މެންދުރުގެ ވަގުތެއްގައި ކުރި އެކްސް ޕޯސްޓެއްގެ މައްސަލައިގަ އެވެ.

އެ ޕޯސްޓްގެ ސަބަބުން ބިރުވެރިކަން އުފެދި ނުރައްކާވާކަމަށްވެސް ފުލުހުން ބުނެފައިވެ އެވެ. ޝާފިއުގެ ޕޯސްޓުގައި ނިސްބަތްކޮށްފައިވަނީ "ކައްޒާބު" އަކަށެވެ. ކައްޒާބަކީ ކާކުކަން ސާފުނުވާއިރު، ފުލުހުންނަށް އެއީ ކާކުކަން އެނގުނީކަމަށް ބައެއް ފަރާތްތަކުން ބުނެ އެވެ.

ސޯޝަލް މީޑިއާގައި ހިޔާލު ފާޅުކުރުމާއި ގުޅިގެން ފުލުހަށް ހާޒިރުކުރާތީ ގިނަ ބަޔަކު ދަނީ ސަރުކާރާއި ހޯމް މިނިސްޓަރު އަލީ އިހުސާންއަށް ފާޑުކިޔަމުންނެވެ.

ޝާފިއު މިއަދު 1:30 އަށް ފުލުހަށް ހާޒިރުކުރި އިރު ގިނަ އަދަދެއްގެ އެމްޑީޕީ މެންބަރުން އެ ސަރަހައްދަށް ގޮސްފައިވެ އެވެ.