އައްޔަން ކުރިތާ ތިން މަސްތެރޭގައި ފްރާންސްގެ ބޮޑުވަޒީރު މިޝެލް ބާނިއާ އިތުބާރު ނެތްކަމަށް ވޯޓެއް ނަގައި މަގާމުން ވަކިކޮށްފި އެވެ.

މިޝެލް ބާނިއާގެ އިތުބާރު ނެތް ކަމަށް ފްރާންސްގެ ޕާލަމެންޓުގެ ތިރިގެ، ނެޝަނަލް އެސެމްބްލީން ފާސްކޮށްފައި މިވަނީ ބަޖެޓް ކުޑަކޮށް، އިތުރު ބައެއް ޓެކްސްތައް ނަގަން ނިންމެވުމާއި ގުޅިގެންނެވެ.

ބުދަ ދުވަހު އޭނާއާ ދެކޮޅަށް ހުށަހެޅުނު މައްސަލައަށް ބޮޑު އަޣުލަބިއްޔަތަކުން ވޯޓުދީފައިވެ އެވެ.

ބޮޑުވަޒީރު ބާނިއާ ވޯޓަކާ ނުލައި ބަޖެޓު ފާސްކުރުމަށް ހާއްސަ ބާރުތަކެއް ބޭނުންކުރުމާ ގުޅިގެން އިދިކޮޅު ޕާޓީތަކުން މި މައްސަލަ ހުށަހެޅި އެވެ.

މިއީ 1962 އިން ފެށިގެން އިތުބާރު ނެތްކަމުގެ ވޯޓަކުން އެ ޤައުމުގެ ސަރުކާރު ވެއްޓުނު ފުރަތަމަ ފަހަރެވެ.

މި ކަމުގެ ސަބަބުން ފްރާންސްގެ ސިޔާސީ ހަމަޖެހުމަށް އިތުރަށް ގޯސްވެގެން ދާނެކަމަށް ބެލެވެ އެވެ. ސަބަބަކީ އެންމެ ފަހުން ބޭއްވުނު ކުއްލި އިންތިޚާބުގައި އެއްވެސް ބަޔަކަށް ޕާލިމަންޓުގައި އަޣުލަބިއްޔަތު ލިބިފައިނުވުމެވެ.

ބޮޑުވަޒީރުގެ އިތުބާރު ނެތްކަމަށް ފާސްކުރަން 288 ވޯޓު ބޭނުންވާއިރު، އިތުބާރު ނެތްކަމަށް ޖުމްލަ 331 މެންބަރުން ވަނީ ވޯޓު ދީފަ އެވެ.

މި ނިންމުމާއެކު އޭނާގެ ވެރިކަން ވެއްޓެން މެދުވެރިވި ބަޖެޓުވެސް ވާނީ ބާތިލުވެފަ އެވެ.

ފްރާންސްގެ ރައީސް އިމެނުއެލް މެކްރޯން އައު ބޮޑުވަޒީރަކު ހޮވަންދެން ބާނިއާ ވަގުތީ ބޮޑުވަޒީރެއްގެ ގޮތުގައި ހުންނަވާނެ އެވެ. މިއަދުގެ ވަގުތެއްގައި ރައީސް މެކްރޯން ގައުމާ މުހާތަބުކުރުމަށް ވަނީ ހަމަޖެހިފަ އެވެ.

ބޮޑުވަޒީރުގެ އިތުބާރު ނެތްކަމުގެ މައްސަލަ ހުށަހެޅީ، ބާނިއާގެ އިޖްތިމާއީ ރައްކާތެރިކަމުގެ އިސްލާހުތަކަށް އެކަށީގެންވާ ތާއީދު ނުލިބުމާ ގުޅިގެން ހޯމަ ދުވަހު ރައީސްގެ ޤަރާރެއް މެދުވެރިކޮށް އެ އިސްލާހުތައް ކުރިއަށް ގެންދިއުމަށް ނިންމެވުމުންނެވެ.

ނެޝަނަލް ރެލީ (އާރްއެން) އާއެކު، އެ ފަރާތްތަކުން ޖުމްލަ 60 ބިލިއަން ޔޫރޯ (49 ބިލިއަން ޕައުންޑް) ގެ ދަރަނި މަދުކުރުން ހިމެނޭ ބާނިއާގެ ސަރުކާރުގެ ބަޖެޓު ބަލައިނުގަނެވޭނެ ކަމަށް ބުނެފައިވެ އެވެ. އާރްއެންގެ ލީޑަރު މެރިން ލޮ ޕެން ބުނީ މި ބަޖެޓަކީ "ފްރާންސްގެ ރައްޔިތުންނަށް ނުރައްކާތެރި" އެއްޗެއް ކަމަށެވެ.

ވޯޓުލުމުގެ ކުރިން، ބާނިއާ ނެޝަނަލް އެސެމްބްލީއަށް ވިދާޅުވެފައިވަނީ އޭނާ މަޤާމުން ވަކިކުރުމަކުން ޤައުމުގެ މާލީ މައްސަލަތަކަށް ހައްލެއް ނުލިބޭނެ ކަމަށެވެ. "އުނދަގޫ ފިޔަވަޅުތަކެއް ހުށަހެޅުމަކީ އަޅުގަނޑަށް ލިބޭ އުފަލެއް ނޫން" އޭނާ ވިދާޅުވި އެވެ.

ބުދަ ދުވަހު ދިން އިންޓަވިއުއެއްގައި ލޮ ޕެން ބުނެފައިވަނީ ބާނިއާ ވަކިކުރުން ފިޔަވައި "އެހެން އެއްވެސް ހައްލެއް ނެތް" ކަމަށެވެ.

ފްރާންސްގައި ރައީސް އިންތިޚާބުކުރަނީ ސަރުކާރާ ވަކިން ކަމަށްވާތީ، ބުދަ ދުވަހުގެ ވޯޓުގެ ނަތީޖާއިން މެކްރޯންއަށް ސީދާ އަސަރެއް ނުކުރާނެ އެވެ.