ރައީސް ޑރ. މުހައްމަދު މުއިއްޒުގެ ޓީވީ ޗެނަލް ހެދުމަށް ހިންގި ކޮރަޕްޝަންގެ މައްސަލަތަކާ ގުޅިގެން ރައީސް އޮފީހުގެ ކޮމިޔުނިކޭޝަން މިނިސްޓަރު އިބްރާހީމް ޚަލީލަށް މަނީލޯންޑަރިންގެ ދައުވާ ކުރެވޭނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ޕީއެންއެފް އިން ރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ ރައީސް މުއިއްޒުގެ ޓީވީ ޗެނަލް އުފެއްދުމުގެ މަސައްކަތް ކުރިއަށްގެންދިޔައިރު، ވެރިކަން ބަދަލުވެގެން އޭނާގެ މައްޗަށް ދައުވާ އުފުލޭނެކަން ޚަލީލަށް އެނގިވަޑައިގަންނަވަން ޖެހޭނެ ކަމަށެވެ.

"ޚަލީލުގެ ވިސްނުމެއް ހުރެއްޖެއްޔާ ތި މަގާމުގަ ހުރެގެން ފައިސާކޮޅެއް މިހާރު ލިބިދާނެ. އެކަމަކު އެ ފައިސާކޮޅަށްވުރެ 15 އަހަރު ޖަލުގައި އޮންނަންޖެހުމުން ލިބޭ ހިތްދަތިކަން މާބޮޑުވާނެ. ޚަލީލްގެ މައްޗަށް މަނީލޯންޑަރިންގެ ދައުވާ ނުއުފުލޭނެ ގޮތަކީ ނެތްގޮތެއް،" ޔާމީން ވިދާޅުވި އެވެ.

އެމަނިކުފާނު ވިދާޅުވީ ގައުމުގެ ވެރިއަކަށް ހުންނަވާ ބޭފުޅަކު އެންގެވިޔަސް ނުކުރަންވާނެ ކަންތައްތައް ހުންނަންވާނެ ކަމަށެވެ. އަދި ގާނޫނާ އެއްގޮތަށް އަމަލުކޮށް ރައްޔިތުންގެ ފަޅީގައި ތިއްބެވުމަށް ޕޮލިސް ކޮމިޝަނަރަށާއި ޗީފް އޮފް ޑިފެންސް ފޯސްއަށް ޔާމީން އިލްތިމާސްކުރެއްވި އެވެ.

މޯލްޑިވްސް މީޑިއާ ހައުސް ރަޖިސްޓްރީކުރިއިރު ހިއްސާދާރުންގެ ގޮތުގައި އަދި ޑިރެކްޓަރުންގެ ބޯޑުގައި ތިބީ ތިން މީހެކެވެ. އެއީ ރައީސްގެ އަމިއްލަގެ މ. ދިމްޔާތު ބެލެހެއްޓުމުގައި މިހާރު އިސްކޮށް ހުންނެވި، ހއ. ވަށަފަރު، ހުސްނުހީނާގޭ، އަބްދުﷲ ޒާހިރު އާއި ރައީސް އޮފީހުގެ މިނިސްޓަރު ޚަލީލުގެ ދޮންދަރި، ގ. ދަނބުކޮކާ، އަހުމަދު ސައިފް ހަލީމް އަދި އައިޝަތު ޝީރީނާ ކިޔާ މީހެކެވެ. މީޑިއާ ހައުސް، ރަޖިސްޓްރީކޮށްފައި ވަނީ ހަލީލު ދިރިއުޅުއްވާ، ގ. ދަނބުކޮކާގަ އެވެ.

ކުންފުނި ރަޖިސްޓްރީ ކުރިއިރު ސައިފް އާއި ޝީރީނާ ހިއްސާދާރުންގެ ގޮތުގައި ތިއްބަސް، އެމްއެމް ޓީވީން ބްރޯޑްކާސްކުރަން ފެށީ އެ ދެ މީހުންގެ ނަން ކުންފުނިން އުނިކޮށް، ހަމައެކަނި އަބްދުﷲ ޒާހިރު އަށް މުޅި ކުންފުނި ބަދަލުކޮށްފަ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ ޕީއެސްއެމްގެ ނަމުގައި ދޫކުރި ލޯނެއްގެ ތެރެއިން އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ކުރިން ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.