މުރައިދޫގެއަށް ބަދަލުވެވަޑައިގަތް ދުވަހުން ފެށިގެން މިދިޔަ ނޮވެމްބަރު މަހުގެ 17 ވަނަ ދުވަހުގެ ނިޔަލަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ކެއުމަށް ހަރަދުވީ ޖުމްލަ 16،538 ރުފިޔާ ކަމަށް ރައްޔިތުންގެ މަޖިލީހުގެ އިދާރާއިން ބުނެފި އެވެ.

މަޖިލީހުގެ ރައީސް އަބްދުއްރަހީމް މުރައިދޫގެއަށް ބަދަލުވެވަޑައިގަތީ މިދިޔަ ޖުލައި މަހުގެ 26 ވަނަ ދުވަހު އެވެ.

އަބްދުއްރަހީމްގެ ކެއުމަށް ހަރަދުވި ފައިސާގެ އަދަދު މަޖިލީހުގެ އިދާރާއިން ހާމަކުރީ އެ މައުލޫމާތު ހޯދަން "ހުރިހާ" އިން ހުށަހެޅި އާރްޓީއައި އަށް ޖަވާބު ދެމުންނެވެ.

މުރައިދޫގެއަށް އަބްދުއްރަހީމް ވަނީ ބައެއް މުވައްޒަފުން ވެސް އައްޔަން ކުރައްވާފަ އެވެ. އެގޭގެ ޗީފް އޮފް ސްޓާފް ކަމަށް ހަމަޖައްސާފައި ވަނީ ނޫސްވެރިޔާ މުންޑޫ އާދަމް ހަލީމެވެ. އަދި އެގޭގެ ޑިރެކްޓަރު ޖެނެރަލް ކަމަށް ރާއްޖޭގެ އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު ވަނީ ހަމަޖައްސާފަ އެވެ.

ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް 6 މެއި 2021 ގައި ދިން ބޮމުގެ ހަމަލާ އަށް ފަހު މުރައިދޫގޭގައި އެމަނިކުފާނު ވަނީ ދިރިއުޅުއްވާފަ އެވެ. ނަމަވެސް އޭގެފަހުން މަޖިލީހުގެ ރައީސްކަން ކުރެއްވި މުހައްމަދު އަސްލަމް އެގޭގައި ނޫޅުއްވަ އެވެ.