ރައީސް ޑރ. މުހައްމަދު މުއިއްޒުގެ ޓީވީ ޗެނަލް ކަމަށްވާ އެމްއެމް ޓީވީ ހިންގާ މޯލްޑިވްސް މީޑިއާ ހައުސް އާއި އެ ކުންފުނީގެ ހިއްސާދާރުން ބޭނުންކޮށްގެން އެމަނިކުފާނު މަނީ ލޯންޑާ ކޮށްފައިވާ ކަމަށް ތުހުމަތުކޮށް އެ މައްސަލަ ތަހުގީގުކޮށްދިނުމަށް އެދި އެމްޑީޕީން ފުލުހުންނަށް މައްސަލަ ހުށަހަޅައިފި އެވެ.

އެ މައްސަލަ ބަލައިދިނުމަށް އެދި އެމްޑީޕީން ފުލުހުންގެ އިދާރާއަށް ފޮނުވި ސިޓީގައި ވަނީ މއ. ސީރާޒީގެއިން ގިނަ ފަންގިފިލާތަކެއް މީޑިއާ ހައުސްއިން ވަނީ ކުއްޔަށް ނެގީ އެ ކުންފުނީގެ އޮފީހާއި, ޓީވީ ސްޓޭޝަން އަދި ތިންވަނަ ފަރާތަކަށް ކުއްޔަށް ދިނުމަށް ކަމަށެވެ.

އެ ފަންގިފިލާތައް ހިފުމަށް ހަ މަސް ދުވަހުގެ އެޑްވާންސް ފައިސާ ދައްކާފައިވާ ކަމަށް ތުހުމަތުކުރެވޭ ކަމަށް ވެސް އެ ސިޓީގައިވެ އެވެ.

"އެންސްޕާގެ އޮފީސް ހިންގުމަށް ތަނެއް ކުއްޔަށް ނެގުމުގެ ނަމުގައި ހަގީގަތުގައި ހިންގި މުއާމަލާތަކި ރައީސް މުއިއްޒުގެ މަސްލަހަތު އޮންނަ އެމްއެމްޓީ ހިންގުމުގެ ހަރަދު ހަމަޖައްސައި ދިނުމެވެ. އެންސްޕާގެ މި މުއާމަލާތާ ގުޅިގެން ފާޑު ކިޔުންތައް އަމާޒުވުމުން އެ އެއްބަސްވުން ބާތިލުކުރަން ނިންމާފައިވާ ކަމަށް އެ ކުންފުނިން ހާމަކުރިޔަސް, ގާނޫނުން މަނާކުރި ކުށުގެ އަމަލު އޮތީ ފުރިހަމަ ވެފައި," އެ ސިޓީގައިވެ އެވެ.

މޯލްޑިވްސް މީޑިއާ ހައުސް ރަޖިސްޓްރީކުރިއިރު ހިއްސާދާރުންގެ ގޮތުގައި އަދި ޑިރެކްޓަރުންގެ ބޯޑުގައި ތިބީ ތިން މީހެކެވެ. އެއީ ރައީސްގެ އަމިއްލަގެ މ. ދިމްޔާތު ބެލެހެއްޓުމުގައި މިހާރު އިސްކޮށް ހުންނެވި، ހއ. ވަށަފަރު، ހުސްނުހީނާގޭ، އަބްދުﷲ ޒާހިރު އާއި ރައީސް އޮފީހުގެ މިނިސްޓަރު ޚަލީލުގެ ދޮންދަރި، ގ. ދަނބުކޮކާ، އަހުމަދު ސައިފް ހަލީމް އަދި އައިޝަތު ޝީރީނާ ކިޔާ މީހެކެވެ. މީޑިއާ ހައުސް، ރަޖިސްޓްރީކޮށްފައި ވަނީ ހަލީލު ދިރިއުޅުއްވާ، ގ. ދަނބުކޮކާގަ އެވެ.

ކުންފުނި ރަޖިސްޓްރީ ކުރިއިރު ސައިފް އާއި ޝީރީނާ ހިއްސާދާރުންގެ ގޮތުގައި ތިއްބަސް، އެމްއެމް ޓީވީން ބްރޯޑްކާސްކުރަން ފެށީ އެ ދެ މީހުންގެ ނަން ކުންފުނިން އުނިކޮށް، ހަމައެކަނި އަބްދުﷲ ޒާހިރު އަށް މުޅި ކުންފުނި ބަދަލުކޮށްފަ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ ޕީއެސްއެމްގެ ނަމުގައި ދޫކުރި ލޯނެއްގެ ތެރެއިން އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ކުރިން ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.