އެޗްޑީސީގެ ހިޔާނާތުގެ މައްސަލައިގައި މީގެ ފަސް މަސް ކުރިން އެ ކުންފުނީގެ ކުރީގެ ޗެއާޕާސަން އަހުމަދު ޒުހޫރު ފޮނުއްވި ކަމަށް ބުނާ ސިޓީ ރައީސް މުހައްމަދު މުއިއްޒަށް ލިބިވަޑައިނުގަންނަވާ ކަމަށް ވިދާޅުވެ އިތުރުފުޅު ހައްދަވައިފި އެވެ.

އެޗްޑީސީގެ ކުރީގެ މެނޭޖިން ޑިރެކްޓަރު، ރައީސްގެ އަރިސް ބޭފުޅެއްކަމަށްވާ އިބްރާހިމް ފަޒުލް ރަޝީދުގެ ބޮޑެތި ހިޔާނާތުގެ މައްސަލަތަކެއް މި ހަފްތާތެރޭގައި ފެންމަތިވުމާއެކު، މީގެ ފަސް މަސްކުރިން ރައީސަށް އެކަން އަންގަވާ އެޗްޑީސީގެ ކުރީގެ ޗެއާޕާސަން އަހުމަދު ޒުހޫރު ފޮނުއްވި ސިޓީއެއް ވަނީ އާންމުވެފަ އެވެ.

އެހެންކަމުން ރައީސަށް ފަޒުލް ހިންގަވަމުން ގެންދެވި ހުރިހާ ހިޔާނާތެއް އެނގިވަޑައިގެން ފިޔަވަޅެއް ނާޅުއްވާހުންނެވިކަން ހާމަވުމުން ގިނަ ބަޔަކު ދަނީ ފާޑުކިޔަމުންނެވެ.

https://www.instagram.com/p/DD4_AlBI8Sv/

ރައީސް އޮފީހުގެ ބޭރުގައި މިއަދު މެންދުރުފަހު ބައެއް ނޫސްވެރިންނާ ބައްދަލުކުރައްވައި ރައީސް ވިދާޅުވީ އެފަދަ ސިޓީއެއް ލިބިވަޑައިނުގަންނަވާ ކަމަށާއި ލިބިވަޑައިގެންނެވި ނަމަ ޔަގީނުން މާ ކުރިން މި މައްސަލާގައި ފިޔަވަޅު އަޅުއްވާނެ ކަމަށެވެ.

ކޮރަޕްޝަން ހިންގައި ގަވާއިދާ ހިލާފަށް ކުރާ ކަމެއް ހުއްޓުވުމުގައި އެ މަނިކުފާނު ފަހަތަށް ޖެހިވަޑައިނުގަންނަވާނެ ކަމަށް ރައީސް ވިދާޅުވި އެވެ. އެ މަނިކުފާނުގެ ވެރިކަމުގައި މިދިޔަ ދުވަސްތަކުގައި ވެސް ހުންނާނީ އެކި ކަންތަކުގައި، އެކި މީހުން އެގޮތަށް ކޮށްފައި ހުރި ކަންކަމުގެ މައުލޫމާތު ލިބިވަޑައިގަތުމުން އެކަމަށް ފިޔަވަޅު އަޅައި، ކަމާބެހޭ ފަރާތްތަކަށް އަންގާފައި ކަމަށް ރައީސް މުއިއްޒު ވިދާޅުވި އެވެ.

ރައީސް މިހެން ވިދާޅުވި ނަމަވެސް ރައީސް އޮފީހުން އެ ސިޓީ ބަލައިގަތް ކަމުގެ ލިޔުމުގެ ކޮޕީއެއް ވަނީ "ހުރިހާ" އަށް ލިބިފަ އެވެ.

ރައީސް އޮފީހުން ޒުހޫރުގެ ސިޓީ ބަލައިގަތްކަމުގެ ލިޔުން

އޭގައި ވާގޮތުން 2023ގެ ޖުލައި މަހުގެ އެއް ވަނަ ދުވަހު 13:23 ގައި ރައީސް އޮފީހުން ވަނީ އެ ސިޓީ ބަލައިގަނެފަ އެވެ. އެހެންކަމުން ރައީސް އޮފީހަށް ލިބޭ ލިޔެކިޔުން ރޫޓްކުރުމަށް އޮންނަ އުސޫލުގެ ތެރެއިން ރައީސަށް އެޑްރެސްކޮށްފައިވާ އެފަދަ މުހިއްމު ސިޓީއެއް ލިބިވަޑައިނުގެން ނޯންނާނެކަން ވަނީ ހާމަވެފަ އެވެ.

ޒުހޫރު އެޗްޑީސީގެ ޗެއާމަން ކަމުން ޕްރައިވެޓައިޒޭޝަންގެ ބޯޑުން ވަކިކުރީ ރައީސް މުއިއްޒުގެ އެންގެވުމަށެވެ.