ވެރިކަންކުރާ ޕީއެންސީއަށް މެމްބަރުން އިތުރުކުރަން އެ މީހެއްގެ ނަމުގައި ވަގު ފޯމެއް ފުރާފައިވާނަމަ، ޕާޓީގެ އޮފީހަށް ދިޔުމުން އެ މައްސަލަ ހައްލުކުރަން ނިންމައިފި އެވެ.

ޕީއެންސީގެ އޮފީސް ހުންނަނީ ބޮޑުތަކުރުފާނުމަގު ސީޓްރެކް ބިލްޑިންގުގެ ހަތްވަނަ ފްލޯގަ އެވެ.

އެ ޕާޓީގެ އިސް އޮފިޝަލަކު "ހުރިހާ"އަށް މިއަދު ވިދާޅުވީ މީހުންނަށް ނޭނގި އެ މީހުންގެ ނަމުގައި ޕީއެންސީގެ މެމްބާޝިޕް ފޯމް ފުރާފައިވާ ކަމުގެ ގިނަ އަދަދެއްގެ ޝަކުވާ ލިބެމުން އަންނަ ކަމަށެވެ. އެހެންވެ އެފަދަ ޝަކުވާއެއް އޮތްނަމަ ޕާޓީގެ އޮފީހަށް ހާޒިރުވުމުން އެ މައްސަލަ ހައްލުކޮށްދޭނެ ކަމަށް އޮފިޝަލް ވިދާޅުވި އެވެ.

"މިހާރުވެސް އަޅުގަނޑުމެން ވާނީ އެފަދަ ބައެއް މީހުން ޕާޓީގެ އޮފީހަށް އައުމުން ސުލްހަވެރިކަމާއެކު އެކަން ހައްލުކޮށްދީފައި. މި މައްސަލަ ވަރަށް ބޮޑު ކަމަށް އަޅުގަނޑުމެންނަށް ފާހަގަކުރެވިފައިވޭ،" އޮފިޝަލް ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ އެންގެވުމަށް އެ ޕާޓީއަށް 100،000 މީހުން ހަމަކުރުމަށް ކުރަމުން އަންނަ މަސައްކަތުގެ ތެރެއިން އިލެކްޝަންސް ކޮމިޝަނަށް ހުށަހަޅާފައިވާ އެ ޕާޓީގެ ގިނަ އަދަދެއްގެ މެމްބާޝިޕް ފޯމްތަކަކީ ވަގު ފޯމްތަކެއް ކަން ވަނީ ފަޅާއަރައިފަ އެވެ.

އިލެކްޝަންސް ކޮމިޝަނަށް ގުޅުމުން ވެސް އެ މައްސަލަ ހައްލުކޮށްދެ އެވެ. އެމްޑީޕީގެ ގައުމީ މަޖިލީހުގެ މަނަދޫ ދާއިރާގެ ރައީސް އަދި މަނަދޫ ދާއިރާގެ ކުރީގެ މަޖިލިސް މެމްބަރު މުހައްމަދު ތޯރިގުގެ ނަމުގައި ވެސް ވަގު ފޯމެއް ހުށަހަޅާފައިވާކަން ވަނީ ފަޅާއަރައިފަ އެވެ. އޭނާ ވަނީ އެ މައްސަލަ ފުލުސް އޮފީހަށް ހުށަހަޅުއްވާފަ އެވެ. ކުރީގެ މިނިސްޓަރު މުހައްމަދު މަލީހު ޖަމާލުގެ އަނބިކަނބަލުންގެ ނަމުގައި ވެސް ވަގު ފޯމެއް ހުށަހަޅާފައިވެ އެވެ.

މުހައްމަދު އައިޝް ނަމަކަށް ކިޔާ މީހަކު ރޭ ވަނީ އޭނާގެ ނަމުގައި އިލެކްޝަންސް ކޮމިޝަނަށް ހުށަހަޅާފައިވާ ވަގު ފޯމު ސޯޝަލް މީޑިއާގައި އާންމުކޮށްފަ އެވެ. އެ ފޯމްގައި ހެކީންގެ ގޮތުގައި ސޮއިކޮށް އިނގިލީގެ ނިޝާން ޖަހާފައި ވަނީ ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން އަލީ އާއި ސީނިއާ ޕޮލިޓިކަލް ޑިރެކްޓަރު ސުއޫދާ އަބްދުﷲ އެވެ. އަދި އެ ފޯމަށް ޒިންމާވާނެ ބޭފުޅެއްގެ ގޮތުގައި ޕީއެންސީގެ ރަޖިސްޓްރާ އަދި ކެނދިކުޅުދޫ ދާއިރާގެ މަޖިލިސް މެމްބަރު މުހައްމަދު އަފޫ ހާމިދު ސޮއިކޮށްފައިވެ އެވެ.