އިދިކޮޅު މައި ޕާޓީ އެމްޑީޕީން "ގާނޫނުއަސާސީގެ ދިފާއު" ގައި މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކޮށްފި އެވެ.

ރޭ ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި ރިޔާސަތުން ހުށަހެޅި އެ ހުށަހެޅުމަށް އެއްވެސް މީހަކު އިއުތިރާޒެއް ނުކުރެ އެވެ. އިހުތިޖާޖަށް ނުކުތުމަށް ނިންމާފައިވަނީ ޖެނުއަރީ 31 ވަނަ ދުވަހު އެވެ.

މި އިހްތިޖާޖު ވެގެންދާނީ ރައީސް މުހައްމަދު މުއިއްޒުގެ ވެރިކަމުގައި ފުރަތަމަ ފަހަރަށް ދުރާލާ ރޭވިގެން އިދިކޮޅުން މަގުމަތީގެ ހަރަކާތެއް ބޭއްވާ ފުރަތަމަ ފަހަރަށެވެ.

މި ހަރަކާތްތަކުގައި އެހެން ސިޔާސީ ޕާޓީތަކާއި މަދަނީ ޖަމިއްޔާތަކުގެ އިތުރުން އާންމު ރައްޔިތުން ބައިވެރިކުރުމަށް ދައުވަތު ދިނުމަށް ވެސް އެމްޑީޕީގެ ގައުމީ މަޖިލީހުން ވަނީ ފާސްކޮށްފަ އެވެ.

އެމްޑީޕީން މަގުމައްޗަށް ނުކުންނަން ނިންމީ ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލާއި ގެންނަމުންދާ ބަދަލުތަކާއި ގުޅިގެންނެވެ.

ރައީސް މުހައްމަދު މުއިއްޒު ބޭނުންފުޅުވެގެން ރައްޔިތުންގެ މަޖިލީހުން ގާނޫނުއަސާސީއަށް ގެނައި އެ ބަދަލުތަކަކީ ގާނޫނުއަސާސީގެ ބާރު ކެނޑޭ ގޮތަށް ގެނައި ބަދަލުތަކެއް ކަމާއި ރައްޔިތުންގެ ހިޔާލު ހޯދުމެއް ނެތި ގެނައި އެ ބަދަލުގެ ސަބަބުން ވެރިކަމުގެ ނިޒާމު މަސްހުނި ވެގެންދާނެ ކަމަށް އެމްޑީޕީން ބުނެފައިވެ އެވެ.

ސަރުކާރުން ގާނޫނު އަސާސީއަށް ގެންނަ ބަދަލުތަކާއި ދެކޮޅަށް އެމްޑީޕީން ވަނީ ޑިސެމްބަރު 10 ގައިވެސް ބޮޑު ޖަލްސާއެއް ބާއްވާފަ އެވެ.