ބައެއް ބަދަލުތަކަކާ އެކު ޗާޕުކުރި 100ރ.ގެ އާ ނޫޓުތައް އަންނަ އާދީއްތަ ދުވަހު ދައުރުކުރަން ފަށާނެ ކަމަށް މަރުކަޒީ ބޭންކު، އެމްއެެމްއޭއިން ބުނެފި އެވެ.

އާ ޗާޕުގައި ހުންނާނެ ބަދަލުތަކުގެ ތެރޭގައި ދިވެހި ރުފިޔާގެ ނިޝާން ނޫޓުގެ ދެ ފަރާތުގައި ވަނީ ހިމަނާފައިވުން ހިމެނެ އެވެ. މި ނޫޓުތަކުގައި ހިމެނޭނީ ކުރީގެ ގަވަރުނަރު އަލީ ހާޝިމްގެ ސޮޔެވެ.

ތާރީހަކަށް ޖަހާފައިވާނީ 7 ޖުލައި 2024، 1 މުހައްރަމް 1446 އެވެ.

އެ ނޫޓުތަކާ އެކު މިހާރު ބޭނުންކުރާ 100ރ.ގެ ނޫޓުތައް ވެސް ދައުރުކުރާނެ ކަމަށް އެމްއެެމްއޭއިން ބުނެ އެވެ.

ޒަމާނުއްސުރެ ރާއްޖޭގައި ބޭނުންކުރަމުން އައި ނޫޓުތަކުގެ ބަދަލުގައި މިހާރު ބޭނުންކުރަނީ ރާއްޖޭގެ މިނިވަންކަމަށް 50 އަހަރު ފުރުމާ ދިމާކޮށް 2016-2017ގައި ސަރުކާރުން ތައާރަފްކުރި 'ރަން ދިހަ ފަހެއް' ސީރީޒްގެ ނޫޓުތަކެވެ.

އެ ސީރީޒްގައި ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓުތަކެވެ.