އެއްފަހަރު ބޭނުން ކޮށްލެވޭ ކުދި މަސްދަޅު މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އިން ބާޒާރަށް ނެރެފި އެވެ.

ސަރުކާރުގެ މަސް ކުންފުނި، މިފްކޯއިން ނެރުނު 140 ގްރާމްގެ ޗަންކްސް އިން އޮއިލް ދަޅު ހެޔޮ އަގުގައި މިހާރު މިފްކޯ މަސްފިހާރަތަކުންނާއި ބާޒާރުން ލިބެން ހުންނާނެ ކަމަށް އެ ކުންފުނިން ބުނެ އެވެ.

މިފްކޯއިން ބުނީ މިފަދަ ލުއި ގޮތަކަށް ފަރުމާ ކޮށްފައިވާ މަސްދަޅުތަކަކީ ކުދި އާއިލާތަކަށް އެއްފަހަރު ބޭނުން ކޮށްލެވޭ ގޮތަށް ތައްޔާރުކޮށްފައިވާ މަސްދަޅު ކަމަށެވެ. މަސްދަޅު ކަނޑާފައި ބާކީ ފްރިޖްގައި ބެހެއްޓުމަށްފަހު ބޭނުން ކުރުމަކީ ރައްކާތެރި ރަނގަޅު ގޮތެއް ނޫންކަން މިފްކޯއިން ވަނީ ފާހަގަކޮށްފަ އެވެ.

މުޅިން އަލަށް ނެރުނު ކުދި މަސްދަޅު ކޭހެއްގައި 48 ދަޅު ހުންނަ އިރު، ކޭހުގެ އަގަކީ 700ރ ކަމަށާއި ވަކިން ވިއްކަނީ 15ރ އަށް ކަމަށް އެ ކުންފުނިން ބުނެ އެވެ.

މިފްކޯއިން އަލަށް ބާޒާރަށް ނެރުނު ކުދި މަސްދަޅު --- ފޮޓޯ: މިފްކޯ

ރައީސް މުހައްމަދު މުއިއްޒުވަނީ އަންނަ ރޯދަ މަހު ރާއްޖޭގެ ކޮންމެ ގޭބިސީއަކަށް 48 ދަޅުގެ މަސްކޭހެއް ދެއްވާނެ ކަމަށް ވިދާޅުވެފަ އެވެ.

މިފްކޯއިން ބުނީ ރައީސްގެ ވައުދުފުޅާ އެއްގޮތަށް ގޭބިސީތަކަށް ބޭނުންވާނެ މަސްދަޅު ތައްޔާރުކުރުމުގެ މަސައްކަތް އެ ކުންފުނިން ކުރަމުންދާ ކަމަށެވެ.