މަޝްހޫރު މިއުޒިކް ބޭންޑް "ކޯލްޑްޕްލޭ"އިން ވަނީ ގިނަ ބަޔަކު އިންތިޒާރުކުރި އެ ބޭންޑުގެ އިންޑިއާ ޓުއާ މީގެ ދެ ދުވަސް ކުރިން މުމްބާއީގައި ފަށައިފަ އެވެ.

އެހެން ނަމަވެސް މުމްބާއީގައި އޮތް އެ ކޮންސެޓަށް ލިބިގެންދިޔައީ ހީކުރި ކަހަލަ ތަރުހީބެއް ނޫނެވެ. ހަބަރުތައް ބުނާ ގޮތުގައި އެ ކޮންސެޓަށް ލިބުނީ ވަރަށް ފިނި ތަރުހީބެކެވެ.

މުމްބާއީގައި ކޯލްޑްޕްލޭގެ ކޮންސެޓެއް އޮންނަކަން އިއުލާން ކުރުމާއެކު މަދު ވަގުތުކޮޅެއްގެ ތެރޭގައި އެ ކޮންސެޓުގެ ޓިކެޓުތައް ހުސްވި އެވެ. 12،000 ރުޕީސްއަށް ވިއްކި ޓިކެޓުގެ އަގު ކަޅު ބާޒާރުގައި އެއް ލައްކައަށް ވުރެ މައްޗަށް އެރި އެވެ.

ޓިކެޓުތަކަށް ލިބުނު ތަރުހީބާއެކު ގިނަ ބަޔަކު ހީކުރީ އެ ކޮންސެޓު ވެގެންދާނީ ވަރަށް ފުރިހަމަ، ޝައުގުވެރި އަދި މަޖާ ޝޯއަކަށް ކަމަށެވެ.

ހީކުރި ގޮތާ ހިލާފަށް އެ ކޮންސެޓު ވެގެން ދިޔައީ ވަރަށް ފޫހި އެއްވެސް ޖޯޝެއް ނެތް ކޮންސެޓަކަށް ކަމަށް އެ ކޮންސެޓަށް ދިޔަ ގިނަ މީހުން ސޯޝަލް މީޑިއާގައި ބުނެފައިވެ އެވެ.

މުމްބާއީގައި ބޭއްވި ކޮންސެޓަށްފަހު ކޯލްޑްޕްލޭގެ އިތުރު ކޮންސެޓްތަކެއް އިންޑިއާގެ ބައެއް އެހެން ސިޓީތަކުގައި ވެސް އޮންނާނެ އެވެ.