އުމްރާއަށް ގެންގޮސްދޭނެ ކަމަށް ބުނެ 27 މީހެއްގެ އަތުން ފައިސާ ނެގުމަށްފަހު އެ މީހުން އުމްރާއަށް ނުފޮނުވި މައްސަލާގައި އަލްމަޝްއަރް ޕްރައިވެޓް ލިމިޓެޑްގެ ވެރިޔާގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.

އެ މައްސަލާގައި ދައުވާކުރަން ފޮނުވީ އެ ކުންފުނީގެ ވެރިޔާ މ. ހަވީރީފިނި، އަލީ ފާރިޝްގެ މައްޗަށެވެ.

ފުލުހުން ބުނީ މިދިޔަ އަހަރު އުމްރާއަށް ގެންދާނެ ކަމަށް ބުނެ އެ ކުންފުނިން 27 މީހެއްގެ އަތުން 500،000 ރުފިޔާ ނަގާފައިވާ ކަމަށެވެ. އެ މީހުން އުމްރާއަށް ފޮނުވާފައިނުވާތީ، ތަހުގީގުން ހާމަވީ މަކަރާއީ ހީލަތް ހަދައިގެން އޭނާ ނެގި ފައިސާއެއް ކަމަށެވެ. އޭނާ އެ ފައިސާއަށް ހިޔާނާތްތެރިވެފައިވާ ކަމަށް ވެސް ދައުވާގައިވެ އެވެ.

އެ މައްސަލަ ޕީޖީ އޮފީހަށް ފޮނުވީ މި މަހުގެ 19 ވަނަ ދުވަހު އެވެ. ފާރިޝްގެ އިތުރުން އަލްމަޝްއަރު ޕްރައިވެޓް ލިމިޓެޑާއި ޓްރިއާ ޕްރައިވެޓް ލިމިޓެޑާއި ހާފްޓޯން މޯލްޑިވްސް ޕްރައިވެޓް ލިމިޓެޑް މައްޗަށް ވެސް ދައުވާކޮށް ދިނުމަށް ފުލުހުން އެދުނެވެ.