ޒިންމާދާރުގޮތުގައި ރަނގަޅު ނޫސްވެރިކަމެއް ކުރުމަށް ފަސްޓް ލޭޑީ ގޮވާލައްވައިފި

ޒިންމާދާރު ގޮތެއްގައި ނޫސްވެރިން މަސައްކަތް ކުރެއްވުމަށް ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ނޫސްވެރިންނަށް ގޮވާލައްވައިފި އެވެ.

ބްރޯޑްކާސްޓިން ކޮމިޝަނުން ބޭއްވި "ވިޝަންސް އޮފް ދަ ފިއުޗާ" ކުރެހުމުގެ މުބާރާތުގެ އިނާމު ދިނުމަށް ނޭޝަނަލް އާޓް ގެލެރީގައި ބޭއްވި ހަފްލާގައި ވާހަކަ ދައްކަވަމުން ސާޖިދާ ވިދާޅުވީ ބްރޯޑްކާސްޓިންއަކީ އަމާނާތެއް ކަމަށާއި އެ ދާއިރާއަށް ލޯ ހުޅުވިފައިވާ ޖީލެއް ބިނާކުރުން މުހިންމު ކަމަށެވެ.

ސާޖިދާ ވިދާޅުވީ ރާއްޖޭގެ ތާރީހުގައި ބްރޯޑްކާސްޓިން ޚިދުމަތަކީ ވަރަށް ފުރިހަމަ ޚިދުމަތެއްކަމަށާއި، އެއީ ފޫހިކަމާއި މާޔޫސްކަން ދުރަށްލައި، ހިތްތަކަށް އުފާވެރިކަން ގެނެސްދިން ޚިދުމަތެއް ކަމަށެވެ. އަދި ރައްޔިތުންނަށް ދީނުގެ މަތިވެރި އުސޫލުތަކާއި މަތިވެރި އަޚްލާގު އުނގަންނައިދީ އެކި ދާއިރާތަކުން މައުލޫމާތު ފޯރުކޮށްދޭ ޚިދުމަތެއް ކަމަށް އެކަމަނާ ވިދާޅުވި އެވެ.

ބްރޯޑްކާސްޓިން ޚިދުމަތަކީ ރަށްރަށް ގުޅުވައިދިން އަގުހުރި ޚިދުމަތެއްކަން ފާހަގަކުރައްވަމުން ފަސްޓް ލޭޑީ ވިދާޅުވީ މީޑިއާގެ އެކި މަންސަތައް މިހާރު ހުރިއިރު އެފަދަ މަންސަތަކަށް ވެސް ރޭޑިއޯ އަދި ޓީވީގެ ދައުރު އަދާނުކުރެވޭ ކަމަށެވެ. އެހެންކަމުން، މި ދެ ޚިދުމަތަކީ ކުރީ ޒަމާނާއި މި ޒަމާނުގެވެސް އެއްޗެއް ކަމަށާއި އެ ދާއިރާގެ މުހިންމުކަން އެނގޭ ޖީލެއް ބިނާ ކުރުމަކީ ކޮންމެހެން މުހިންމު ކަމެއްކަމަށް މެޑަމް ސާޖިދާ ވިދާޅުވި އެވެ.

އެހެންކަމުން ވަރަށް ޒިންމާދާރު ގޮތެއްގައި ނޫސްވެރިކަމާއި ކޮންޓެންޓް އުފެއްދުމުގެ މަސައްކަތް މީޑިއާތަކުން ހިންގަން ޖެހޭ ކަމަށް އެކަމަނާ ވިދާޅުވި އެވެ. އެގޮތުން ޒިންމާދާރު ގޮތުގައި، ކަމަށްކަމޭ ހިތައިގެން މީޑިއާތަކުގެ މަސައްކަތް ކުރާ ނޫސްވެރިންނަށް ގޮވާކަމަށް ވެސް އެކަމަނާ ވިދާޅުވި އެވެ.

ސާޖިދާ އިތުރަށް ވިދާޅުވީ ބްރޯޑްކޮމްއިން ކުރިއަށްގެންދިޔަ މުބާރާތަކީ އައު ޖީލެއް ބްރޯޑްކާސްޓިން ދާއިރާއަށް ޝައުގުވެރިކުރުވުމަށް ކުރިއަށްގެންދިޔަ މުހިންމު ހަރަކާތެއް ކަމަށާއި، މި ދާއިރާ ކުރިއަށް އޮތްތަނުގައި ވެސް އިތުރަށް ފުޅާވެގެން ދިއުމަށް އެދިވަޑައިގަންނަވާ ކަމަށެވެ.

ބްރޯޑްކޮމްގެ "ވިޝަން އޮފް ދަ ފިއުޗާ" މުބާރާތަކީ 3 އުމުރުފުރައަކަށް ބަހާލައިގެން ކުރިއަށްގެންދިޔަ ކުރެހުމުގެ މުބާރާތެކެވެ. މި މުބާރާތުގައި ކޮންމެ އުމުރުފުރައަކުން ތިން ވަނަ ވަނީ ހޮވާފަ އެވެ.