ޕޯޓް ކޮމްޕޮލެކްސްގައި ހިންގާ އިލެކްޝަން ކޮމިޝަން (އީސީ) ގެ އިދާރާ ހުސްކުރަން އެމްޕީއެލުން އަންގައިފި އެވެ.

އީސީގެ އޮފީސް އިމާރާތް ހިންގަމުން ގެންދަނީ ޕޯޓް ކޮމްޕްލެކްސްގެ 4 ފްލޯއެއްގައިއެވެ. އެތަނުގައި އީސީ ހިންގާތާ 21 ވަރަކަށް އަހަރު މިވަނީ ވެފައެވެ. އެއީ ކޮންމެ 5 އަހަރަކުން އެއްބަސްވުން އާކުރާ ގޮތަށެވެ. މަސައްކަތްކުރެވޭ ވަރަށްވުރެ ބޮޑަށް ބާވެފައިވާތީ އީސީން ހިންގާ ފްލޯތައް ހުސްކުރަން އެމްޕީއެލުން އެންގި ހުސްވި އަހަރުގެ އޮކްޓޫބަރު މަހު އެވެ.

އެހެންވެ އިމާރާތެއް ހޯދަން ފިނޭންސް މިނިސްޓްރީގެ ލަފާއަކަށް އެދުމުން ވަކި ގޮތެއް ހަމަނުޖެހުނު ކަމަށް ވަނަށް ވަނީ މައުލޫމާތު ލިބިފައެވެ.

އެހެންކަމުން ތަނެއް ހަމަނުޖެހުމުން 10 އަހަރުގެ މުއްދަތަށް ކުއްޔަށް ދޭނެ އިމާރާތެއް ހޯދަން އޮކްޓޫބަރު 16 ގައި އީސީން އިއުލާން ކުރި އެވެ.

އެކަމަކު ބިޑަށް ކުރިމަތި ފަރާތްތަކުން ކޮންޓްރެކްޓުގެ ގޮތުގައި ހުށަހެޅި އަގު 5 މިލިއަން ރުފިޔާއަށްވުރެ ބޮޑުވުމުން އަލުން ތަނެއް ހޯދުމަށް އިއުލާންކުރަން ޓެންޑަ ބޯޑުގައި އީސީން އެދުނުވެ.

އޭގެ ޖަވާބުގައި ފިނޭންސުން އީސީގައި ބުނީ ސަރުކާރުގެ އޮފީސްތައް ހިންގުމުގެ ޖާގައިގެ ދަތިކަން ހައްލުކުރުމަށްޓަކައި ކުރިއަށް 2 އަހަރު ދުވަހުގެ ތެރޭގައި ހައްލެއް ހޯދާތީވެ އެ އިމާރާތުގައި އީސީއަށް ތިބެވޭނެ ގޮތް ހަމަޖައްސައިދޭން ކަމަށެވެ. އެކަމަކު އިތުރު 2 އަހަރު ދުވަހަށް އެތަން ދޫނުކުރެވޭނެ ކަމަށް އެމްޕީއެލުން އީސީއަށް އެންގި އެވެ.

އީސީން ބުނީ އެމްޕީއެލުން އެހެން އަންގާފައިވާތީ މިހާރު ކުރިއަށްދަނީ އެކަމުގައި ފިނޭންސުގެ ބަހެއް ހޯދުމުގެ މަސައްކަތް ކަމަށެވެ.

އީސީގެ އޮފީހުގައި ދާއިމީ ގޮތެއްގައި 60 ވަރަކަށް މުވައްޒަފުން މަސައްކަތް ކުރެ އެވެ.