ރައީސް ޑރ. މުޙައްމަދު މުއިއްޒު، އިލެކްޝަންސް ކޮމިޝަންގެ މެންބަރުކަމަށް ދެ ބޭފުޅަކު، އައްޔަންކުރައްވައިފި އެވެ.

އިލެކްޝަންސް ކޮމިޝަނަށް ދެ މެންބަރުން އައްޔަން ކުރައްވާފައިވަނީ އެކޮމިޝަންގެ ދެ މެންބަރެއްގެ އިތުބާރު ނެތްކަމަށް ނިންމައި ރައްޔިތުންގެ މަޖިލީހުން އެ ދެ މެންބަރުން ވަކިކުރުމާ ގުޅިގެންނެވެ. ސޮލާހު އެންމެ ފަހުން ހުންނެވީ ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ޕީއެސްއަކަށެވެ. އޭނާ އެ މަގާމުން އިސްތިއުފާ ދެއްވީ މިދިޔަ އަހަރުގެ ކުރީކޮޅުގަ އެވެ.

އެ މަގާމުތަކަށް އާންމުކޮށް ހުޅުވާލުމުން ކުރިމަތިލި މެންބަރުންގެ ތެރެއިން ރައީސަށް ފެނިވަޑައިގަންނަވާ ނަންތައް މަޖިލީހަށް ހުށަހަޅުއްވައި މަޖިލީހުން ރުހުން ދީފައިވަނީ މި މަހުގެ 15 ވަނަ ދުވަހު ދައުރުން ބޭރުން ބޭއްވި ޖަލްސާގަ އެވެ.

ރައީސް އިލެކްޝަންސް ކޮމިޝަނުގެ މެންބަރުކަމަށް ޢައްޔަންކުރެއްވީ ދަފުތަރު ނަންބަރު ރސ 1548، މުޙައްމަދު ޒާހިދާއި ކ. ހުރާ، ރޯޒް/ ޢަބްދުއްރަހުމާން ސޮލާހު ރަޝީދު އެވެ. މެންބަރުކަމަށް ޢައްޔަން ކުރެއްވިކަމުގެ ލިޔުން، މި ދެ މެންބަރުންނާ ރައީސުލްޖުމްހޫރިއްޔާ ހަވާލުކުރެއްވީ، އެކަމަށްޓަކައި ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްސަ ރަސްމިއްޔާތެއްގަ އެވެ.

އީސީއަށް އައްޔަން ކުރި ޒާހިދު އެޗްއާރުސީއެމުން ވަކިކުރީ ކުރީގެ މަޖިލީހުގައި އޭނާގެ އިތުބާރު ނެތް ކަމަށް ފާސްކޮށްގެންނެވެ.

މި ރަސްމިއްޔާތުގައި މެންބަރުކަމުގެ ލިޔުން ހަވާލުކުރެއްވުމުގެ ކުރިން، ސުޕްރީމް ކޯޓުގެ ފަނޑިޔާރު މަހާޒް އާލީ ޒާހިރުގެ ކުރިފުޅުމަތީގައި، މުހައްމަދު ޒާހިދާއި އަބްދުއްރަހުމާން ސޮލާހު ރަޝީދު، ވަނީ އިލެކްޝަންސް ކޮމިޝަނުގެ މެންބަރުކަމުގެ ހުވައިކުރައްވައި، ހުވައިގެ އިގުރާރުގައި ސޮއިކުރައްވާފަ އެވެ.

އިލެކްޝަންސް ކޮމިޝަނަށް އަލަށް އައްޔަން ކުރެއްވި ދެ މެންބަރުންނާއެކު އެކޮމިޝަނުގެ މެންބަރުންގެ އަދަދު މިހާރު ހަމަވީ އެވެ. އެ ކޮމިޝަނަކީ ފަސް މެންބަރުންގެ މައްޗަށް އެކުލެވިފައިވާ ކޮމިޝަނެކެވެ.

އިލެކްޝަންސް ކޮމިޝަނުގެ މެންބަރުންނަކީ ޑރ. މުޙައްމަދު ޒާހިރު، ހަސަން ޒަކަރިއްޔާ، އަބްދުލް ހަސީބް އިސްމާއީލް، މުގައްމަދު ޒާހިދު އަދި އަބްދުއްރަހުމާން ސޮލާހު ރަޝީދުއެވެ.

އިލެކްޝަންސް ކޮމިޝަންގެ މެންބަރުން ހަމަވިނަމަވެސް އެކޮމިޝަންގެ ރައީސާއި ނައިބުގެ މަގާމު އޮތީ ހުސްކޮށެވެ. ގާނޫނަށް މިފަހުން ގެނައި ބަދަލާއެކު އެކޮމިޝަންގެ ރައީސާއި ނައިބު އައްޔަން ކުރައްވާނީ ރައީސުލްޖުމްހޫރިއްޔާއެވެ. އެމަނިކުފާނު މި ދެ ބޭފުޅުން އައްޔަން ކުރައްވާނީ މަޖިލީހުގެ ރުހުން ހޯއްދެވުމަށްފަހު އެވެ.