އެމެރިކާގެ ވެރިރަށް ވޮޝިންގްޓަންގެ އެއާޕޯޓަކަށް ޖައްސަން އުޅުނު މަތިންދާބޯޓަކާއި އަސްކަރީ ހެލިކޮޕްޓަރެއް ޖެހި، ނުރައްކާތެރި އެކްސިޑެންޓެއް ހިނގައިފި އެވެ.

މި ހާދިސާ ހިނގާފައިވަނީ، ރޭގަން ވޮޝިންގްޓަން ނެޝަނަލް އެއާޕޯޓަށް ޖައްސަން ދިޔަ އެމެރިކަން އެއާލައިންސްގެ ފްލައިޓެއް، އެމެރިކާގެ އަސްކަރިއްޔާގެ ބްލެކް ހޯކްސް ހެލިކޮޕްޓަރެއްގައި، ވައިގެ ތެރޭގައި ޖެހިގެންނެވެ.

ވައިގެ ތެރޭގައި ހިނގި އެކްސިޑެންޓުގައި، އެ އުޅަނދުތައް އެއާޕޯޓު ކައިރީގައި އޮންނަ ޕޮޓޯމެކް ކޯރަށް ވަނީ ވެއްޓިފަ އެވެ. އެމެރިކާގެ ސީބީއެސް ނޫހުން ބުނެފައިވާ ގޮތުގައި، މިހާތަނަށް 19 މީހުންގެ ހަށިގަނޑު އެ ކޯރުން ވަނީ ނަގައިފަ އެވެ.

އެމެރިކަން އެއާލައިންސްއިން ބުނީ، ހާދިސާ ހިނގި ވަގުތު މަތިންދާބޯޓުގައި 64 ފަސަންޖަރުންނާއި ހަތަރު ކްރޫއިން ދަތުރުކުރަމުންދިޔަ ކަމަށެވެ.

އެމެރިކާގެ އަސްކަރިއްޔާއިން ބުނީ، އެ ބޯޓުގައި ޖެހުނު ހެލިކޮޕްޓަރުގައި ސިފައިންގެ ތިން މީހުން ތިބި ކަމަށެވެ.

އެ މަތިންދާބޯޓުގައި ތިބި މީހުންގެ އާއިލާތައް ވަނީ ރޭގަން އެއާޕޯޓަށް ޖަމާވެފަ އެވެ. ނަމަވެސް، މި ހާދިސާއާ ގުޅޭ އެއްވެސް މަޢުލޫމާތެއް ނުލިބޭކަމުގެ ޝަކުވާ އާއިލާތަކުން ދަނީ ކުރަމުންނެވެ.

އެމެރިކަން އެއާލައިންސްގެ ފްލައިޓް 5342 ރޭގަން އެއާޕޯޓަށް ދަތުރުކުރަމުން ދިޔައީ ވިޗިޓާ، ކެންސަސްއިން ފުރައިގެންނެވެ.

މަތިންދާބޯޓާއި ހެލިކޮޕްޓަރު ޖެހުނު ވަގުތު، ވައިގެ ތެރޭގައި ބޮޑު ގޮވުމެއް ގޮވައި، ރޯވެފައި އޮތް ބޯޓު ޕޮޓޯމެކް ކޯރަށް ވެއްޓެންދާ ބައެއް ވީޑިއޯތައް ވަނީ އާންމުވެފަ އެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމުގެ މިހާރު ވަނީ ތަހުގީގު ފަށައިފަ އެވެ.