ވޯޓުލާން ނުކުންނަ އަދަދު މަދު، މިހާތަނަށް ވޯޓުލީ ލައްކައެއްހާ މީހުން

މިހާރު ކުރިޔަށްދާ ލޯކަލް ކައުންސިލްގެ އިންތިހާބާ އަންހެނުންގެ ތަރައްގީއަށް މަސައްކަތްކުރާ އިންތިހާބު ގައި ވޯޓުލާން ނުކުންނަ މީހުންގެ އަދަދު ވަރަށް ބޮޑަށް މަދުވެއްޖެ އެވެ.

މާލޭގެ އިތުރުން ރާއްޖޭގެ އެކި ސަރަހައްދުތަކުގައި ވޯޓުލުން ފަށާފައި ވަނީ ހެނދުނު 7:00 ގަ އެވެ.

އިލެކްޝަންސް ކޮމިޝަންގެ ރައީސް އަހުމަދު ޝަރީފް ޓުވިޓާގައި ވިދާޅުވެފައި ވަނީ މެންދުރު 2:00 އާ ހަމަޔަށް ވޯޓުލީ 1،00829 މީހުންނެވެ. މީގެ ތެރޭގައި ހިމެނެނީ 53،689 ފިރިހެނުން އަދި 47،140 އަންހެނުންނެވެ.

ކޮވިޑް -19 ގެ ބަލިމަޑުކަމާ ހެދި ލަސްކުރި މި އިންތިޚާބުގައި 982 މެންބަރުން ލޯކަލް ކައުންސިލްތަކަށް އިންތިޚާބުކުރަން ހަމަޖެހިފައިވެ އެވެ. މީގެ އިތުރުން އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކަށް 930 މެންބަރުން އިންތިޚާބުކުރަން ހަމަޖެހިފައިވެ އެވެ.

އެހެން އިންތިހާބުތަކާ ހިލާފަށް މި ލޯކަލް ކައުންސިލްތަކުގެ އިންތިހާބުގައި ވޯޓުލާން ކިއޫތައް ހަދަން ފެށީ ވެސް ލަހުންނެވެ.

ވޯޓުލުން ކުރިއަށް ގެންދާނީ އިލެކްޝަންސް ކޮމިޝަނުން ހަމަޖައްސާފައިވާ ގޮތުން މިއަދުގެ ހެނދުނު 7 އިން ހަވީރު 5 އަށެވެ. ކޮވިޑް-19 އާ ގުޅިގެން ކަރަންޓީނާއި އައިސޮލޭޝަންގައި ތިބި މީހުން ވޯޓުލާން ހާއްސަ ގަޑިއަކީ ހަވީރު 5 އިން 6 އެވެ.

ލާމަރުކަޒީ ގާނޫނަށް ގެނައި އިސްލާހުތަކާއެކު ބާއްވާ ފުރަތަމަ ލޯކަލް ކައުންސިލްގެ އިންތިހާބު ކުރިޔަށްދާއިރު ކޯވިޑްގެ ހާލަތާއި ގުޅިގެން މީގެކުރިން އެކި ފަހަރުމަތިން އިންތިހާބު ފަސްކުރިއެވެ. އިންތިހާބުގެ ކަންތައްތައް ވިހާވެސް ހަމަހަމަކަމާއި އަދި ރައްކާތެރިކަމާއެކު ކުރިޔަށްގެންދާނެ ކަމުގެ ޔަގީންކަން އީސީން ވަނީ ދީފަ އެވެ.

ލޯކަލް ކައުންސިލް އިންތިހާބުގައި 2،234 ކެންޑިޑޭޓުން، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 1،580 ކެންޑިޑޭޓުން ވާދަކުރާއިރު ވޯޓު ދިނުމުގެ ހައްގު 273،128 މީހަކަށް ލިބިފައިވެ އެވެ.