މީޑިއާގައި މަސައްކަތް ކުރާ ފަރާތްތައް އަނިޔާވެރިކޮށް މަރާލުމަށް ރައްޔިތުންގެ މަޖިލީހުގެ ޖަލްސާއެއްގައި ވެރިކަންކުރާ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ގޮވާލި މައްސަލަ ތަހުގީގު ކުރުމާ މެދު ޕްރޮސިކިއުޓާ ޖެނެރަލްގެ އޮފީހުގެ ލަފަޔަކަށް ފުލުހުން އެދިއްޖެ އެވެ.

މި މަހުގެ 27 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ފަލާހު ވިދާޅުވީ އޭނާއާ ގުޅޭ ވީޑިއޯއެއް އާންމުވެފައިވާ ކަމަށް ބުނެ ބައެއް ނޫސްތަކުގައި ދޮގު ހަބަރު ފެތުރި ކަމަށެވެ. އެހެންވެ މީޑިއާގައި މަސައްކަތް ކުރާ ފަރާތްތައް "އުލުބައިންދަން" ފަލާހު ގޮވާލި އެވެ.

ދިވެހި ރަދީފުގައި އުލުބޭންދުމުގެ މާނަ:

"މާ އިހު ޒަމާނުގައި މީހުން މަރަން ހަދާ ގޮތެއް ކަމުގައި ބުނެވޭ ގޮތެއް. އުލުބައިންދާ އިރު ހަދާ ގޮތެއް ކަމަށް ބުނަނީ ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދަނީ އެވެ. ބޭންދީމާ އެ އޫ ފުރަގަސް ފަރާތުން ވަދެގެން ގޮސް ބޮލުން ނުކުންނަނީ އެވެ."

އެ މައްސަލަ ފުލުހުންނަށް ހުށަހެޅީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންނެވެ.

ފުލުހުން މިރޭ ބުނީ އެމްޖޭއޭ އިން ހުށަހެޅި އެ މައްސަލަ ތަހުގީގު ކުރުމާ މެދު ގާނޫނީ ލަފަޔަކަށް އެދި ޕީޖީ އޮފީހަށް ހުށަހަޅާފައިވާ ކަމަށެވެ.

ފަލާހުގެ އެ ވާހަކަ ގިނަ ބަޔަކު އަންނަނީ ކުށްވެރިކުރަމުންނެވެ. ނަމަވެސް ރައީސް އޮފީހުގެ މިނިސްޓަރު އިބްރާހީމް ހަލީލާއި އިންފޮމޭޝަން މިނިސްޓަރު އިބްރާހީމް ވަހީދު ވަނީ އެކަން ކުށްވެރިކުރަން ދެކޮޅު ހައްދަވާފަ އެވެ.