ތ. ގާދިއްފުއްޓާއި ލ. މާވަށުގައި އަލުން ވޯޓުލުން ބޭއްވުމަށް އިލެކްޝަންސް ކޮމިޝަނުން ނިންމައިފި އެވެ.

އެ ކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމެއްގައި ކޮމިޝަނުގެ ރައީސް އަހްމަދު ޝަރީފް ވިދާޅުވީ ލިބިފައިވާ ޝަކުވާތައް ބެލިއިރު އެ ދެ ރަށަށް ނިސްބަތް ނުވާ މީހަކު ރަށު ކައުންސިލް އިންތިހާބުގައި ވޯޓުލާފައިވާކަން ސާބިތުވާ ކަމަށެވެ. އެހެންކަމުން އެ ދެ ރަށުގައި ވޯޓުލުން އަލުން ކުރިއަށްގެންދަން ނިންމާފައިވާ ކަަށް ޝަރީފް ވިދާޅުވި އެވެ.

ޝަރީފް ވިދާޅުވި ގޮތުގައި ގާދިއްފުށީ ކައުންސިލަށް ލ. ކުނަހަންދޫ މީހަކާއި، ރ. އިންނަމާދޫ މީހެއް ވޯޓުލާފައިވާކަން އެނގެން އެބައޮތެވެ.

އޭނާ ވިދާޅުވިގޮތުގައި ގާދިއްފުށި ކައުންސިލްގެ އަންހެނުންނަށް ހާއްސަކޮށްފައިވާ ދެ ގޮނޑިއަށް ވާދަކުރި ދެ ކެންޑިޑޭޓެއްގެ ދެމެދުގައި ދެ ވޯޓް ތަފާތު އެބަހުއްޓެވެ. އަދި ދާއިރާއިން ބޭރުން ވޯޓްލީ ދެ މީހުން ވޯޓް ދިނީ ކޮން ގޮތަކަށްކަން ސާފެއް ނުވެ އެވެ. ސަބަބަކީ ސިއްރު ވޯޓަކަށްވާތީ އެވެ.

އެހެންކަމުން ދެ ވޯޓުގެ ތަފާތު ހުރި ދެ ކެންޑިޑޭޓްގެ ދެމެދުގައި ވޯޓުލުން އަލުން ކުރިއަގެންދަން ވަނީ ނިންމާފަ އެވެ. ވޯޓުލުން ކުރިއަށްގެންދާނީ ހަމައެކަނި ގާދިއްފުށީގަ އެވެ.

ލ. މާވަށު ކައުންސިލްގެ ރައީސް ކަމަށް ވާދަކުރި ދެ ކެންޑިޑޭޓުންނަށް އެއްވަރަކަށް ވޯޓު ލިބިފައިވާއިރު، ދާއިރާ އިން ބޭރު މީހަކު އެ ފޮއްޓަށް ވޯޓުލިކަން ސާބިތުވާ ކަމަށް ޝަރީފް ވިދާޅުވި އެވެ.

އެހެންކަމުން އެ ދެ ކެންޑިޑޭޓުންގެ މެދުގައި އެ ރަށުގައި ވޯޓްލުން ކުރިއަށް ގެންދަން ވަނީ ނިންމާފަ އެވެ.