ޖެނިފާ ލޮޕޭޒްގެ ލޯބީގެ ހަޔާތަކީ އެކި ފަހަރު މަތިން ހޮލީވުޑް މީޑިއާގެ ސަމާލުކަމަށް އައިސްފައިވާ ކަމެކެވެ. އޭނާގެ ހަޔާތުގައި ހިނގާފައިވާ ކޮންމެ ކަމެއް ވެސް ރިޕޯޓުތަކަށް އަރާފައިވެ އެވެ.

އެގޮތުން 90ގެ ފަހުކޮޅު ޖޭލޯއާއި އެހެން ލަވަކިޔުންތެރިއެއް ކަމަށްވާ ސޯން ކޯމްބްސް ލޯބީގެ ގޮތުން ގުޅިގެން އުޅުނުއިރު ހިނގާފައިވާ ހާދިސާއެއް އަނެއްކާވެސް މީޑިއާއަށް ވަނީ ތިލަވެފަ އެވެ.

އެއީ ޑިޑީއާއި ޖެނިފާ ލޯބީގެ ގޮތުން ގުޅިގެން އުޅުނު ދުވަސްވަރު ވިލް ސްމިތުއާއި އޭނާގެ އަންހެނުންނާ ޖެހުނު މައްސަލައެއްގެ ވާހަކަ އެވެ.

ބުނެވޭ ގޮތުގައި ވިލްއާއި އޭނާގެ އަންހެނުން ޖޭޑާ ޖެނިފާއަށް ޖިންސީ ފުރައްސާރަ ކުރުމުން ޑިޑީ ރުޅިގަދަވެ ވިލްއަށް ޖިސްމާނީ ގޮތުން އަނިޔާކުރާ ހިސާބަށް ކަންތައް ދިޔަ އެވެ.

މިދިޔަ އަހަރުގެ ފަހުކޮޅު އޮތް ޓޯކް ޝޯއެއްގައި އެ ހާދިސާއާ ބެހޭ ގޮތުން ސުވާލު ކުރެވުމުން ޑިޑީ ވަނީ އެއަށް ޖަވާބު ނުދީ ދޫކޮށްލާފަ އެވެ.

1999 ން 2001 އަށް ޑިޑީއާއި ޖެނިފާ ލޯބީގެ ގޮތުން ގުޅިގެން އުޅުނެވެ. އެ ދެމީހުންގެ ގުޅުމަކީ އޭރުވެސް މީޑިއާގައި އާއްމުކޮށް ދެކެވޭ ވާހަކަ އެކެވެ.