ގިރާވަރު ފަޅުން ގޯތި ލިބުނު ފަރާތްތަކުގެ މެދުގައި އައު ޕްލޮޓު ކަނޑައެޅުމުގެ ގުރުއަތުލުން މިއަދު ފަށައިފި އެވެ.

ގުރުއަތުލުން ކުރިއަށްދަނީ ސޯޝަލް ސެންޓަރުގައި އެވެ.

މިނިސްޓްރީއިން މިއަދު ބުނެފައިވަނީ ގިރާވަރުފަޅުގެ ލޭންޑް ޔޫސް ޕްލޭން އަށް ބަދަލު ގެނެވި، އައު ލޭންޑް ޔޫސް ޕްލޭނެއް ތައްޔާރުކުރެވިފައިވާތީ، އެ ޕްލޭންއަށް ރިޢާޔަތްކޮށް ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަޙައްދަށް ބަދަލު އައިސްފައިވުމުން، އައު ލޮޓް ނަންބަރު ވަނީ ކަނޑައެޅިފައި ކަމަށާއި މިއަދު ކުރިއަށް މިދަނީ، މި ބަދަލާއި ގުޅިގެން ގިރާވަރުފަޅުން ގޯތި ޙަވާލުކޮށްފައިވާ ފަރާތްތަކުގެ މެދުގައި އައު ޕްލޮޓް އެލޮކޭޓް ކުރުމަށްޓަކައި ގުރުއަތުލުމުގެ މަސައްކަތް ކަމަށެވެ.

މިނިސްޓްރީން ބުނެފައިވާގޮތުގައި ގިރާވަރުފަޅުން ބިން ލިބޭ ފަރާތްތަކުގެ ތެރެއިން ގުރުއަތުލާ ހޯލަށް، ބިން ލިބިފައިވާ ފަރާތް/ފަރާތްތަކުގެ ތެރެއިން ކޮންމެ ޕްލޮޓަކަށް 01 (އެކެއް) ފަރާތަށް ވަދެވޭނެ އިންތިޒާމު ހަމަޖެހިފައިވާނެއެވެ. އެގޮތުން ގުރުއަތުލާއިރު ޕްލޮޓް އެލޮކޭޓްކުރެވޭ ފަރާތްތަކަށް ވަގުތުން އެފަރާތަކަށް ލިބުނު ޕްލޮޓް ނަންބަރު އެސް.އެމް.އެސް ގެ ޒަރިއްޔާއިން ލިބިގެންދާނެކަންވެސް މިނިސްޓްރީން ފާހަގަކުރެއެވެ.

މިނިސްޓްރީއިން ކުރިން ނެރުނު އިއުލާނުގައި ބުނެފައިވަނީ ގޯތިލިބޭ ފަރާތްތަކުގެ ގުރުއަތުލުން ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުންތަކާގުޅޭ މަޢުލޫމާތު މި މިނިސްޓްރީ އިން ފަހުގެ ތާރީޚެއްގައި ޙިއްސާކުރާނެ ކަމަށާއި އަދި ބިން ހިއްކާ ނިމުމުން، ގޯތި ލިބިފައިވާ ފަރާތްތަކާ ގޯތި ހަވާލުކުރުމުގެ މަސައްކަތް ކުރިއަށް ގެންދެވޭނެ ކަމަށެވެ.