އެމެރިކާއާ އިޒްރޭލުން ހޮނިހިރު ދުވަހު އީރާނަށް ދިން ހަމަލާގައި އީރާނުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމުގެ ބަދަލުހިފުމުގެ ގޮތުން، ހައިފާގެ ދެކުނުގައި އޮންނަ އިޒްރޭލުގެ އަސްކަރީ މަރުކަޒަކަށް މިސައިލާއި ގިނަ އަދަދެއްގެ ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައިވާ ކަމަށް ހިޒްބުﷲ އިން ހާމަކޮށްފި އެވެ.

މިއީ 2024 ވަނަ އަހަރުގެ ނޮވެމްބަރު މަހު އެމެރިކާ މެދުވެރިވެގެން އިޒްރޭލާއި ހިޒްބުﷲ އާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުމަށްފަހު، އެ ޖަމާއަތުން އިޒްރޭލަށް ދިން ފުރަތަމަ ހަމަލާ އެވެ. އަލްމަނާރު ޓީވީ މެދުވެރިކޮށް ހިޒްބުﷲ އިން ނެރުނު ބަޔާނެއްގައި ބުނެފައިވަނީ، ހޯމަ ދުވަހުގެ މެންދަމުގެ ވަގުތެއްގައި ދިން މި ހަމަލާ އަމާޒުކޮށްފައިވަނީ އިޒްރޭލުގެ "މިޝްމާރު ހަކާމަލް" މިސައިލް ދިފާއީ މަރުކަޒަށް ކަމަށެވެ.

ހިޒްބުﷲ އިން ބުނި ގޮތުގައި، އިޒްރޭލުން ލުބުނާނުގެ ބިންތަކަށް ވެރިވެގަނެ، ވޭތުވެދިޔަ 15 މަސްދުވަހު ހިންގަމުންދާ އުދުވާންތައް ހުއްޓުވުމަށްޓަކައި، މިފަދަ އިންޒާރުގެ ހަމަލާތަކެއް ދިނުމަކީ ކޮންމެހެން ކުރަންޖެހޭ ކަމެކެވެ.

މި ހަމަލާތަކާ ގުޅިގެން އިޒްރޭލުގެ އަސްކަރިއްޔާއިން ބުނީ، ލުބުނާނުން ފޮނުވާލި ބައެއް މިސައިލްތައް ދިފާއީ ނިޒާމުން ހުއްޓުވާފައިވާ ކަމަށާއި، ބައެއް ހަމަލާތައް ފަޅު ސަރަހައްދުތަކަށް ވެއްޓިފައިވާ ކަމަށެވެ. މި ހަމަލާތަކުގައި އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.

ލުބުނާނުގެ ބޮޑުވަޒީރު ނަވާފް ސަލާމް މިކަމާ ގުޅިގެން ވިދާޅުވީ، ލުބުނާނުގެ ދެކުނުން ދިން މި ހަމަލާތަކަކީ ޒިންމާދާރުކަން ކުޑަ އަދި ޝައްކު އުފެދޭ އަމަލެއް ކަމަށެވެ. އަދި ގައުމު އިތުރު ނުރައްކަލެއްގެ ތެރެއަށް ވައްޓާލުމަށް ފުރުސަތު ނުދެއްވާނެ ކަމަށާއި، ލުބުނާނުގެ ރައްޔިތުން ހިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށް އޭނާ ވިދާޅުވި އެވެ.

މި ހަމަލާއަށްފަހު، އިޒްރޭލުން ވަނީ ލުބުނާނުގެ ބައެއް ސަރަހައްދުތަކަށް، ހާއްސަކޮށް ބައިރޫތުގެ ދެކުނު ސަރަހައްދުތަކަށާއި ހިޒްބުﷲގެ މަރުކަޒުތަކަށް ވައިގެ މަގުން ހަމަލާދޭން ފަށާފަ އެވެ. އިޒްރޭލުން ވަނީ ލުބުނާނުގެ ދެކުނުގެ 52 އަވަށެއްގެ ރައްޔިތުން ވަގުތުން ގެދޮރު ދޫކޮށް ދިއުމަށް އަމުރުކޮށްފަ އެވެ.

އަނެއްކޮޅުން، އީރާނުގެ ވެރިރަށް ތެހެރާނާއި ކަރަޖް ސިޓީގެ ބައެއް ސަރަހައްދުތަކުން ބާރުގަދަ ގޮވުންތަކެއްގެ އަޑު އިވިފައިވާ ކަމަށް އެ ގައުމުގެ މީޑިއާތަކުން ވަނީ ރިޕޯޓްކޮށްފަ އެވެ. މި ހަމަނުޖެހުންތަކުގެ ސަބަބުން މުޅި މެދުއިރުމަތީގެ މަސްރަހު ވަނީ ނުތަނަވަސްވެފަ އެވެ. މި ހަނގުރާމައިގެ ސަބަބުން ދުނިޔޭގެ ވައިގެ ދަތުރުފަތުރަށާއި ތެލުގެ ބާޒާރަށްވެސް ނޭދެވޭ އަސަރުތަކެއް ކުރަމުންދާކަން ފާހަގަކުރެ ވެއެވެ.

މީގެ އިތުރުން، އެމެރިކާގެ ޕެންޓަގަންގެ ރިޕޯޓްތަކާ ހަވާލާދީ ބައެއް މަސްދަރުތަކުން ބުނާ ގޮތުގައި، އިޒްރޭލުން އިސްވެ އީރާނަށް ހަމަލާ ނުދޭ ނަމަ، އީރާނުން އެމެރިކާގެ ސިފައިންނަށް ހަމަލާދިނުމުގެ އެއްވެސް ވިސްނުމެއް ނެތެވެ. މިއީ އީރާނުގެ ފަރާތުން ކުއްލި ނުރައްކަލެއް އޮތް ކަމަށް ބުނެ އެމެރިކާގެ ސަރުކާރުން ކުރަމުންދާ ދައުވާތަކާ ފުށުއަރާ ކަމެއްގެ ގޮތުގައި ވަނީ ފާހަގަކުރެވިފަ އެވެ.