އީރާނުގެ މަނަވަރަކަށް އެމެރިކާ އިން ހަމަލާދީ، 87 އަށް ވުރެ ގިނަ މީހުން މަރުވި ހާދިސާއަށް ފަހު، އީރާނުގެ އަސްކަރީ އެހެން މަނަވަރެއް ސްރީލަންކާގެ ކަނޑުގެ ސަރަހައްދުން އެ ގައުމުގެ އެހީތެރިކަމުގެ ދަށަށް ގެންގޮސްފި އެވެ.

"އައިރިންސް ބޫޝެހްރް" ނަމަކަށް ކިޔާ މި މަނަވަރުގެ އިންޖީނަކަށް ދިމާވި މައްސަލައަކާ ގުޅިގެން، ލަންކާގެ ބަނދަރަކަށް ކައިރިކުރުމުގެ ހުއްދައަށް އެދިފައިވަނީ މިދިޔަ ބުދަ ދުވަހު އެވެ. މި މަނަވަރުގައި ތިބި 208 މީހުން މިހާރު ވަނީ ރައްކާތެރިކަމާއެކު މަނަވަރުން ބާލާފަ އެވެ.

ގިނަ ގަޑިއިރުތަކެއްގެ މަޝްވަރާއަށްފަހު، ލަންކާގެ އިރުއުތުރު ބަނދަރަކަށް އެ މަނަވަރު ކައިރިކުރުމުގެ ހުއްދަ އެ ގައުމުގެ ރައީސް ދެއްވީ "އިންސާނިއްޔަތުކަން އިސްކުރުމުގައި ފަސްނުޖެހޭނެ" ކަމަށް ވިދާޅުވަމުންނެވެ.

އީރާނާ ދެކޮޅަށް އެމެރިކާ އާއި އިޒްރޭލުން ކުރިއަށްގެންދާ އަސްކަރީ ހަމަނުޖެހުމުގެ މެދުގައި ލަންކާ ތާށިވެފައިވީ ނަމަވެސް، އެ ގައުމުން ވަނީ ވަކި ފަރާތަކަށް ނުޖެހޭ ސިޔާސަތެއް ގެންގުޅޭނެކަން ހާމަކޮށްފަ އެވެ. ރައީސް އަނޫރާ ކުމާރާ ޑިސަނަޔަކަ ނެރުއްވި ބަޔާނެއްގައި ވިދާޅުވީ، ލަންކާގެ އަމާޒަކީ އިންސާނީ ކަރާމާތް ދެމެހެއްޓުމާއެކު، ވަކި ފަރާތަކަށް ނުޖެހޭ ސިޔާސަތު ހިމާޔަތްކުރުން ކަމަށެވެ.

ބުރާސްފަތި ދުވަހު އޭނާ ވިދާޅުވި ގޮތުގައި، ލަންކާ އިން އަމަލުކުރި ގޮތަކީ ބައިނަލްއަގުވާމީ މުއާހަދާތަކަށް އިހުތިރާމްކުރުމާއި، ގައުމުގެ އަބުރާއި އިންސާނީ ފުރާނަ ސަލާމަތްކުރުމަށް އިސްކަންދޭކަން ހާމަވާ ފަދަ ގޮތެކެވެ.

މި ހާދިސާ ހިނގާފައި މިވަނީ، ލަންކާގެ ދެކުނުން ގާތްގަނޑަކަށް 44 ނޯޓިކަލް މޭލު (81 ކިލޯމީޓަރު) ބޭރުން އީރާނުގެ "އައިރިސް ދެނާ" މަނަވަރަށް އެމެރިކާގެ ސަބްމެރީނަކުން ޓޯޕިޑޯ ހަމަލާއެއް ދީ ފައްތާލާފައި ވަނިކޮށެވެ.

ބޭ އޮފް ބެންގޯލްގައި ކުރިއަށްދިޔަ ބައިނަލްއަގުވާމީ ކަނޑުގެ އަސްކަރީ ތަމްރީނެއްގައި ބައިވެރިވި މި މަނަވަރުގައި 180 އެއްހާ ފަޅުވެރިން ތިއްބެވެ. މި މަނަވަރު ފައްތާލުމަކީ މެދުއިރުމަތީގެ ހަމަނުޖެހުން އިތުރަށް ގޯސްވެގެންދިޔަ ކަމެއްގެ ގޮތުގައި ބެލެ ވެއެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ މި ހަމަލާ ސިފަކުރެއްވީ "ކަނޑުމަތީގައި ހިންގި ލާއިންސާނީ އަމަލެއް" ގެ ގޮތުގަ އެވެ. އަދި މިކަމާ މެދު އެމެރިކާ ހިތާމަކުރަން ޖެހޭނެ ކަމަށް އޭނާ ވިދާޅުވި އެވެ.

ވޭތުވެދިޔަ ހަފުތާ ބަންދުގައި އިޒްރޭލާއި އެމެރިކާ ގުޅިގެން އީރާނަށް ދޭންފެށި ހަމަލާތަކުގައި އެ ގައުމުގެ އަސްކަރީ 20 ވަރަކަށް އުޅަނދު ވަނީ ހަލާކުކޮށްލާފަ އެވެ.

އިންޖީނުގެ މައްސަލައެއް ދިމާވި "އައިރިންސް ބުޝެހްރް" މަނަވަރު ލަންކާގެ މައި ވިޔަފާރި ބަނދަރު ކަމަށްވާ ކޮޅުބާ ކައިރީގައި އޮތް ނަމަވެސް، ރައީސް ދިސާނަޔަކަ ހުއްދަ ދެއްވީ ތްރިންކޮމަލީ ބަނދަރަށް ކައިރިކުރުމަށެވެ. އެއީ ކޮޅުބު ބަނދަރަށް ކައިރިކޮށްފިނަމަ، ލަންކާގެ ކަނޑުގެ ސިނާއަތަށް ނޭދެވޭ އަސަރެއް ކޮށްފާނެތީ ކަމަށް އޭނާ ވިދާޅުވި އެވެ.

މި މަނަވަރުގައި ތިބި 53 އޮފިސަރުންނާއި، 84 ކެޑޭޓް އޮފިސަރުންނާއި، 48 ސީނިއާ ސެއިލަރުން އަދި 23 ފަޅުވެރިން ކޮޅުބަށް ގެންދިއުމުގެ މަސައްކަތް މިހާރު ދަނީ ކުރަމުންނެވެ. މީގެ އިތުރުން، އެމެރިކާގެ ހަމަލާގައި އަޑިއަށްދިޔަ "އައިރިސް ދޭނާ" މަނަވަރުން ގެއްލުނު މީހުން ހޯދުމުގެ މަސައްކަތް ލަންކާގެ ކަނޑުގެ ސިފައިން އަދިވެސް ދަނީ ކުރަމުންނެވެ. އެ މަނަވަރުން ސަލާމަތްވި 32 މީހަކަށް މިހާރު ދަނީ ގޯލްގެ ހޮސްޕިޓަލެއްގައި ފަރުވާދެމުންނެވެ.

1948 ވަނަ އަހަރު މިނިވަންވީއްސުރެ ސްރީލަންކާ އަކީ ވަކި ފަރާތަކަށް ނުޖެހޭ ސިޔާސަތެއް ގެންގުޅޭ ގައުމެކެވެ. އެ ގައުމަކީ އީރާނާއި އެމެރިކާއާ ދެމެދުވެސް އިގްތިސާދީ އަދި ސިޔާސީ ވަރުގަދަ ގުޅުމެއް އޮންނަ ގައުމެކެވެ. އެގޮތުން އީރާނުން 250 މިލިއަން ޑޮލަރުގެ ސާފުނުކުރާ ތެޔޮ ގަނެ، އޭގެ ބަދަލުގައި ކޮންމެ މަހަކު ސައިފަތް ބޭރުކޮށްގެން ދަރަނި ދައްކަމުންދާއިރު، އެމެރިކާއަކީ ލަންކާގެ ފޭރާމުގެ އުފެއްދުންތައް އެންމެ ގިނައިން ބޭރުކުރާ ގައުމެވެ.