"ދަ އާޗީސް" އަދި "ޖިގްރާ" ފަދަ ކާމިޔާބު ފިލްމުތަކުން އާމްނުންގެ މަގުބޫލުކަން ހޯދަމުންދާ ބޮލީވުޑްގެ ޒުވާން އެކްޓަރު ވެދާންގް ރައިނާ، އޭނާގެ އަމިއްލަ ދިރިއުޅުމާއި ލޯބީގެ ހަޔާތާ ގުޅޭގޮތުން ދެކެވޭ މުހިންމު ވާހަކަތަކަށް ސީދާ ޖަވާބެއް ދީފި އެވެ.

އެޗްޓީ ސިޓީއަށް ދިން ހާއްސަ އިންޓަވިއުއެއްގައި އޭނާ ވަނީ މިވަގުތު އޭނާގެ ރިލޭޝަންޝިޕް ސްޓޭޓަސް ސާފުކޮށްދީ، މީޑިއާގައި ދެކެވޭ އަޑުތަކަށް ނިމުމެއް ގެނެސްދީފަ އެވެ.

ފިލްމީ ދާއިރާއަށް ނުކުތް ދުވަސްވަރު ވެދާންގްގެ ލޯބީގެ ދިރިއުޅުމާ ގުޅުވައިގެން ތަފާތު ވާހަކަތަކެއް ވަނީ ފެތުރިފަ އެވެ. ހާއްސަކޮށް "ދަ އާޗީސް" ގެ ކޯ-ސްޓާރު ހުޝީ ކަޕޫރާއެކު އޭނާ އުޅެނީ ލޯބީގެ ގުޅުމަކުން ކަމަށް މީޑިއާތަކުގައި ވަރަށް ބޮޑަށް އަޑު ފެތުރުނެވެ.

އެ ދެ ތަރިން އެކުގައި ތަފާތު ހަފްލާތަކުން ފެނުމާއި، ސޯޝަލް މީޑިއާގައި ދެމީހުންގެ މެދުގައި އޮންނަ ގާތްކަމުގެ ސަބަބުން ސަޕޯޓަރުންވެސް ގަބޫލުކުރީ އެއީ ލޯބީގެ ގުޅުމެއް ކަމަށެވެ.

މީގެ އިތުރުންވެސް، ފިލްމީ ދާއިރާގެ އެހެން ބައެއް ޒުވާން ތަރިންނާ ގުޅުވައިގެން އެކި ދުވަސްވަރު ސޯޝަލް މީޑިއާގައި ވާހަކަތައް ދެކެވުނު ނަމަވެސް، ވެދާންގް ވަނީ އެއީ ހަމައެކަނި ފެތުރޭ އަޑުތަކެއް ކަމަށް ބުނެފަ އެވެ.

އޭނާއާ ގުޅުވައިގެން ދެކެވޭ މިފަދަ ހުރިހާ ވާހަކަތަކެއް ދޮގުކުރަމުން ވެދާންގް ވަނީ އޭނާއަކީ މިވަގުތު ސިންގަލް މީހެއްކަން ވަރަށް ސާފުކޮށް ކަށަވަރު ކޮށްދީފަ އެވެ.

އަމިއްލަ ދިރިއުޅުމާ ގުޅޭގޮތުން އާންމުންގެ ތެރޭގައި ދެކެވޭ ތަފާތު ވާހަކަތަކާ މެދު ސުވާލު ކުރުމުން އޭނާ ބުނީ، އެފަދަ އަޑުތަކަށް މާބޮޑު ސަމާލުކަމެއް ދީގެން ވަގުތު ދުއްވާލަން ބޭނުންނުވާ ކަމަށެވެ.

ވެދާންގް ފާހަގަކުރި ގޮތުގައި އޭނާގެ މުޅި ހަޔާތާއި ސަމާލުކަން މިވަގުތު އަމާޒުކޮށްފައިވަނީ ފިލްމީ ކެރިއަރަށެވެ. އެކްޓިންގެ ދާއިރާއިން ކުރިއަށްދިއުމަށްޓަކައި ކުރަންޖެހޭ މަސައްކަތްތަކަށް އިސްކަންދޭން ބޭނުންވާތީ، ލޯބީގެ ގުޅުމަކަށް ވުރެ ބޮޑަށް އޭނާ ބޭނުންވަނީ އަމިއްލަ މަސައްކަތުން ބެލުންތެރިންގެ ހިތްތައް ފަތަހަކުރުމަށެވެ.

މި އިންޓަވިއުގައި އޭނާގެ ކެރިއަރުގެ މިސްރާބާ ގުޅޭގޮތުން ވާހަކަ ދައްކަމުން، ބޮލީވުޑްގެ މަޝްހޫރު އެކްޓަރު ރަންބީރު ކަޕޫރު ފިލްމުތައް އިހްތިޔާރުކުރާ ގޮތަށް އޭނާ ވަރަށް ބޮޑަށް ތައުރީފުކުރި އެވެ.

އެގޮތުން ރަންބީރުގެ "ބަރްފީ" އާއި "ރޮކްސްޓާ" ފަދަ ތަފާތު ރޯލުތަކަކީ އޭނާއަށް ވަރަށް ބޮޑު އިންސްޕިރޭޝަނެއް ކަމަށާއި، އަމިއްލަ ކެރިއަރުގައިވެސް އެފަދަ ގޮންޖެހުން ބޮޑު ތަފާތު ކެރެކްޓާތައް ކުޅެގެން ކުރިއަށްދިއުމަކީ އޭނާގެ އެންމެ ބޮޑު އުއްމީދު ކަމަށް ވެދާންގް ބުންޏެވެ.