Yameen anburaa jalah lumah dhaulathun fenbovaigenfaivaa minvaru fenijje: Dr. Jameel

ކުރީގެ ރައީސް އަބްދުﷲ ޔާމީން އަބްދުލްގައްޔޫމް އަނބުރާ ޖަލަށް ލުމަށް ދައުލަތުން ފެންބޮވައިގެންފައިވާ މިންވަރު މިއަދުގެ ޝަރީއަތުން ފެނިގެންގޮސްފައިވާ ކަމަށް އެމަނިކުފާނުގެ އިސް ވަކީލު، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.

ކޯޓު މަރުހަލާގައި ރައީސް ޔާމީންގެ ދެ މައްސަލައެއް އޮތްއިރު، އެއީ އެމްއެމްޕީއާރުސީ މެދުވެރިކޮށް ވ. އާރަށާއި ރ. ފުއްގިރި ކުއްޔަށް ދިނުމުގައި ރިޝްވަތު ނަންގަވައި މަނީ ލޯންޑަކުރެއްވި ކަމަށް ތުހުމަތުކުރާ މައްސަލަ އެވެ. މީގެ ތެރެއިން އާރަށް މައްސަލައިގައި ކުރިން އިއްވި 11 އަހަރުގެ ޖަލު ހުކުމް ހައި ކޯޓުން ބާތިލުކޮށް އަލުން ބަލަން އެންގިފަހުން، އަޑުއެހުމެއް ނުބާއްވާ އަހަރު ދުވަސްވެފައިވަނިކޮށް މިއަދު ވަނީ ޝަރީއަތުގެ ކުރިން ހުށަހަޅާ ހުށަހެޅުންތަކަށް ފުރުސަތު ދިނުމުގެ އަޑުއެހުމެއް ބާއްވާފަ އެވެ.

ޝަރީއަތުގެ އަޑުއެހުމަށްފަހު 'ދައުރު' ނޫހަށް ދެއްވި އިންޓަވިއުއެއްގައި ޑރ. ޖަމީލު ވިދާޅުވީ، މިއަދަކީ 2023ގެ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒު، ޔާމީން މިނިވަންކުރުމުގެ ވައުދާއެކު ވާދަކުރެއްވިއިރު، އެމަނިކުފާނުގެ އަނބިކަނބަލުން ކެމްޕޭންގައި ރަސްމީކޮށް ބައިވެރިވެވަޑައިގަތް ދުވަސް ކަމަށެވެ. އަދި ދިގު މުއްދަތަކަށްފަހު ހަމަ މި ތާރީހުގައި ޝަރީއަތްތައް ފެށުމުން، ޔާމީނާ މެދު ރައީސް މުއިއްޒު ގެންގުޅުއްވާ "އުސްލޫބު" ސާފުވާ ކަމަށް ވިދާޅުވި އެވެ.

މީގެއިތުރުން ވޭތުވެދިޔަ އަށް އަހަރު ދުވަހު ދައުވާއެއްގެ ތެރޭގައި ޔާމީން ތާށިކޮށްގެން އުޅެނީ ދައުލަތުން އިސްވެ އިންތިޒާމީ ގޮތެއްގައި ރާވައިގެން ކަމަށާއި، ކުށެއް ސާބިތުވުމުގެ ކުރިން މައުސޫމް މީހެއް ކަމަށް ބެލުމުގެ ހައްގަށް ވެސް ދައުލަތުން ޖާގަ ދީފައިނުވާ ކަމަށް ޖަމީލު ފާހަގަކުރެއްވި އެވެ.

މިއަދުގެ އަޑުއެހުމުގައި ދައުލަތުން ވަނީ، އާރަށް މުއާމަލާތުގެ ތެރެއިން ޔާމީންގެ އެކައުންޓަށް ޖަމާވި 1 މިލިއަން ޑޮލަރަކީ ޑޮލަރު މާރުކުރުމުގެ ފައިސާކަން ސާބިތުކުރަން އެމަނިކުފާނުގެ ފަރާތްޕުޅުން ހުށަހެޅުއްވި ހެކިތައް ބަލައިނުގަތުމަށް އެދިފަ އެވެ. މީގެ ކުރިން ޝަރީއަތް މެދުކެނޑުނީ، ޔާމީންގެ ހެކިންގެ ހެކިބަސް ނަފީކުރަން ދައުލަތުން ހުށަހެޅި އާ ހެކިތައް އެއްފަރާތްކުރުމަށް ހައި ކޯޓުން އިރުޝާދު ދިނުމުން، އެ ހެކިތައް ހުށަހެޅުމުގެ ފުރުސަތު ހޯދަން ދައުލަތުން ސުޕްރީމް ކޯޓަށް ދިއުމުންނެވެ. ނަމަވެސް ސުޕްރީމް ކޯޓުން ވެސް ނިންމާފައި ވަނީ އެ ހެކިތައް ހުށަހެޅުމުގެ ފުރުސަތު ނުދެވޭނެ ކަމަށެވެ.

ޝަރީއަތުގެ ކުރިން ހުށަހެޅި ހުށަހެޅުންތަކާމެދު ގޮތެއް ނިންމުމަށް އަންނަ މަހުގެ 12 ވަނަ ދުވަހު އަޑުއެހުމެއް ތާވަލުކޮށްފައިވާތީ، މާ ދިގު މުއްދަތެއް ނުނަގާ މެދުކެނޑުމެއްނެތި މައްސަލަ ނިންމުމުގެ ވިސްނުން ދައުލަތުގެ އޮތް ކަމަށް ބެލެވޭ ކަމަށްވެސް ޖަމީލު ވަނީ ވިދާޅުވެފަ އެވެ.