ތެލް އަވީވް (21 މެއި)- ފަލަސްތީނުގެ ޣައްޒާ ސަރަހައްދު ބަލަހައްޓަމުން އަންނަ ހަމާސް ޖަމާއަތަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަރުގަދަ އިންޒާރެއް ދެއްވައިފި އެވެ.

އިޒްރޭލާ ހަމާސް ޖަމާއަތާ ދެމެދު ކުރިއަށް ދިޔަ ހަމަލާތައް ހުއްޓާލިތާ ކުޑަ އިރުކޮޅެއްގެ ތެރޭގައި ދެއްކެވި ވާހަކަފުޅެއްގައި ނަތަންޔާހޫ ވަނީ ހަމާސް ޖަމާއަތުން އެއްބަސްވުމާއި ކުޑަ ނަމަވެސް ޚިލާފެއް ވެއްޖެނަމަ ފުރިހަމަ ބާރުގެ ބޭނުންކޮށް އިޒްރޭލުގެ ރައްދު ދެވޭނެ ކަމަށް ވިދާޅުވެފަ އެވެ. އޭނާ ވަނީ އެފަދަ ހާލަތެއް ކުރިމަތި ވެއްޖެނަމަ އިހުނަށްވުރެ އިޒްރޭލުގެ ބާރުގަދަވާނެ ކަމަށް އިންޒާރު ދެއްވާފަ އެވެ.

ނަތަންޔާހޫ ވިދާޅުވެފައި ވަނީ ހަމާސް ޖަމާއަތާ ދެކޮޅަށް ކުރި އެގާރަ ދުވަހުގެ ހަނގުރާމައިގައި އިޒްރޭލަން ވަރަށް ބޮޑު ކާމިޔާބެއް ލިބިފައިވާ ކަމަށެވެ. އަދި އެ އޮޕަރޭޝަންގައި އިޒްރޭލުން ހާސިލްކުރަން ބޭނުންވި ލަނޑުދަނޑިތައް ހާސިލްކުރެވުނު ކަމަށް ބުނެ ކާމިޔާބުތައް ވަނީ އިއުލާނު ކޮށްފަ އެވެ.

ހަމަލާތައް ހުއްޓާލުމާއެކު ފަލަސްތީނުގެ ރައްޔިތުން ވެސް ވަނީ އެ ގައުމުގެ މަގުތަކަށް ނިކުމެ ލިބުނު ނަޞްރު ފާހަގުކޮށް، އުފާ ފާޅުކޮށްފަ އެވެ. އެ ގައުމުގެ ގިނަ ރައްޔިތުން ދެކޭ ގޮތުގައި މިއީ އިޒްރޭލާ ދެކޮޅަށް ފަލަސްތީނަށް ލިބެން އޮތް ނަޞްރުގެ ފެށުމެވެ.

އެގާރަ ދުވަހަށް ދެމިގެންދިޔަ މި ހަމަލާ ބަދަލުކުރުންތަކުގައި ފަލަސްތީނުގެ 232 މީހަކު ޝަހީދު ކޮށްލާފައި ވާއިރު އޭގެ ތެރޭގައި 65 ކުޑަކުދިން ހިމެނެ އެވެ.

ޣައްޒާގައި ހިނގި ކުރިމަތިލުންތަކުގެ ތަފާސް ހިސާބުތައް

ބިމާ ހަމަވެފައިވާ އިމާރާތް ތަކުގެ ދަށުން މީހުން ސަލާމަތް ކުރުމުގައި ރެސްކިއު ޓީމުތައް ހަރަކާތްތެރި ވަމުންދާއިރު މި އަދަދުތައް އިތުރުވުމަކީ އެކަށީގެންވާކަމެއް ކަމަށް ފަލަސްތީނުގެ ސިއްހީ އިދާރާތަކުން ބުނެ އެވެ.

ހަމަލާތައް ހުއްޓާލަން ދެ ފަރާތުން އެއްބަސްވީ މިސްރު މެދުވެރިއެއްގެ ގޮތުގައި އިސްވެ ކުރިއަށް ގެންދިޔަ ސުލްހައިގެ މަޝްވަރާތަކަކަށް ފަހު އެވެ.

އެއްބަސްވުމާބެހޭ ގޮތުން ހަމާސްއިން ބުނެފައި ވަނީ އިޒްރޭލުން އެއްބަސްވުމާ ޚިލާފު ވެއްޖެނަމަ މުޅި އިޒްރޭލު ގުޑުވާލާނެ ފަދަ ވަރުގަދަ ރައްދެއް ދޭން ތައްޔާރަށް އޮތް ކަމަށެވެ. – އަލް އަރަބިއްޔާ