ހައިކޯޓަށް މިއަހަރުގެ ފުރަތަމަ ހަ މަސް ދުވަހު ތެރޭގައި ހުށަހަޅާފައިވާ މައްސަލަތަކުގެ ތެރެއިން 357 މައްސަލައެއް ނިންމައިފި އެވެ.

ހައިކޯޓުން ބުނިގޮތުގައި މިއަހަރުގެ ފުރަތަމަ ހަ މަސް ދުވަހުގެ ތަފާތު ހިސާބުތަކަށް ބަލާލާއިރު، އެންމެ ގިނަ މައްސަލަ ނިންމާފައިވަނީ މާޗް މަހު އެވެ. އެއީ އެ މަހު 100 މައްސަލަ ނިންމާފައިވާއިރު ޖަނަވަރީ މަހު 76 މައްސަލަ އަދި ފެބްރުއަރީ މަހު 32 މައްސަލައެއް ނިންމާފައިވެ އެވެ. އޭޕްރީލް މަހު 29 މައްސަލައެއް ނިންމާފައިވާއިރު މޭ މަހު ނިންމާފައިވަނީ 40 މައްސަލަ އަދި ޖޫން މަހު 82 މައްސަލަ ވަނީ ނިންމާފަ އެވެ.

މިއަހަރުގެ ފުރަތަމަ ހަ މަސް ދުވަހު އެންމެ ގިނައިން ބަލާފައިވަނީ މަދަނީ މައްސަލަ ކަމަށާއި އެގޮތުން އެކަމާ ގުޅުން ހުރި 178 މައްސަލައެއް ބަލާފައިވާ ކަމަށް އެކޯޓުގެ ތަފާތު ހިސާބުތަކުން ދައްކާ އެވެ. އަދި ޖީނާއި 110 މައްސަލައެއް ބަލާ ހުކުމް ކޮށްފައިވާ ކަމަށްވެސް އެކޯޓުން ބުންޏެވެ. ދުސްތޫރީ ފަސް މައްސަލައެއް ނިންމާފައިވާއިރު، އިންތިޚާބީ ހަތް މައްސަލައެއް އެ ކޯޓުން ފައިސަލާކޮށްފައިވެ އެވެ.

ހައިކޯޓަށް މިއަހަރުގެ ހަ މަސްދުވަހު ތެރޭގައި 354 މައްސަލަ ހުށަހަޅާފައިވާއިރު އެކޯޓަށް ބަލައިގަނެފައިވަނީ 240 މައްސަލަ އެވެ.

ހުށަހެޅުނު މައްސަލަތަކުގެ ތެރެއިން ބަލައިނުގަތުމަށް ނިންމާފައިވަނީ 117 މައްސަލައެކެވެ.

ކޯޓަށް ބަލައިގަނެފައިވާ މައްސަލަތަކުގެ ތެރެއިން އެންމެ ގިނައީ މަދަނީ މައްސަލަތަކެތެވެ. ޖުމްލަ 81 މަދަނީ މައްސަލަ ބަލައިގަނެފައިވާއިރު ޖިނާއީ 73 މައްސަލައަކާއި، ވަޒީފާއާ ބެހޭ 38 މައްސަލައާއި ޓެކުހާ ގުޅޭ 19 މައްސަލައާއި، އާއިލީ 12 މައްސަލަ ކޯޓަށް ބަލައިގަނެފައިވެއެވެ.