އެމްއެމްޕީއާރްސީގެ ކޮރަޕްޝަންގެ ތުހުމަތުގައި ބޮޑެތި ދައުވާތަކެއް އުފުލާފައިވާ ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ހުސެއިން މަނިކާ ދެކޮޅަށް ދައުލަތުން ހިއްސާކޮށްފައިވާ ލިޔެކިޔުންތަކެއް ސާފުނުވާކަމަށް ދިފާއީ ވަކީލުން ވިދާޅުވުމުން މިއަދުގެ ޝަރީއަތް ކެންސަލް ކޮށްފި އެވެ.

އެމްއެމްޕީއާރުސީގެ ޚިޔާނާތުގެ މައްސަލައެއްގައި ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު ނިހާން އުފުލާފައިވާ ދައުވާތަކުގެ ޝަރީއަތުގައި މިއަދު ކްރިމިނަލް ކޯޓުގައި ތާވަލްކޮށްފައި އޮތީ ދައުވާ އިއްވުމާއި ދައުވާއަށް ޖަވާބުދާރީވުމަށް ބޭއްވި އަޑުއެހުމެކެވެ.

މިއަދުގެ އަޑު އެހުމުގެ ނިހާނުގެ ވަކީލް ވިދާޅުވީ ދައުލަތުގެ ފަރާތުން ހުށަހަޅާފައިވާ ލިޔެކިޔުންތައް ކިޔަން ނޭނގޭ ކަމަށާއި އެލިޔެކިޔުންތައް ސާފު ނުވާ ކަމަށެވެ. އަދި ދައުލަތުން ހުށަހަޅާފައިވާ ސޮޕްޓް ކޮޕީގައި ވެސް ހުރިހާ ލިޔެކިޔުންތަކެއް ނެތް ކަމަށް ވެސް ނިހާނުގެ ވަކީލުން ވިދާޅުވި އެވެ.

އެހެންކަމުން ގާޒީ އަލީ އާދަމް ވަނީ އަނެއްކާ ވެސް ލިޔެކިޔުންތަކުގެ ހާޑުކޮޕީ ދިފާއަށް އަދި ޝަރީއަތަށް ހުށަހެޅުމަށް އަންގަވާފަ އެވެ. ހުރިހާ ލިޔެކިޔުމެއް ހުށަހަޅަން ދައުލަތަށް ދީފައި ވަނީ ތިން ދުވަހުގެ މުއްދަތެކެވެ.

މިއަދުގެ އަޑުއެހުން އޮންލައިންކޮށް ކުރިއަށް ގެންގޮސްފައިވާއިރު ނިހާންގެ ފަރާތުން އަދި ދައުލަތުން ވެސް ވަނީ ކޯޓަށް ހާޒިރުވެ އެ މައްސަލާގެ ޝަރީއަތް ކުރިއަށް ގެންދާ ގޮތަށް ހަމަޖެއްސުމަށް އެދިފަ އެވެ. އެހެންވެ، ގާޒީ ވެސް ވަނީ އެގޮތަށް ނިންމަވާފަ އެވެ.

ޕީޕީއެމްގެ ޕާލިމެންޓަރީ ގްރޫޕްގެ ލީޑަރު އަދި މަޖިލީހުގެ މެޖޯރިޓީ ލީޑަރުކަން ކުރެއްވި ނިހާނުގެ މައްޗަށް ދައުލަތުން ވަނީ ހަ ދައުވާއެއް އުފުލާފަ އެވެ. ނިހާންގެ މައްޗަށް އުފުލާފައި ވާނީ ރިޝްވަތު ހިފުމުގެ ކުށުގެ ތިން ދައުވާއަކާއި ރިޝްވަތު ލިބިގަތުމަށް އެދުމުގެ ކުށުގެ ދެ ދައުވާއަކާއި މަނީލޯންޑަރިންގެ ކުށުގެ ދައުވާއެކެވެ.

އެމްއެމްޕީއާރުސީގެ ހިޔާނާތާއި ގުޅިގެން އެސެޓް ރިކަވަރީ ކޮމިޝަނުން ކުރިޔަށް ގެންދިޔަ ތަހުގީގަށް ނީހާނާއި އޭނާގެ އައިލީ ބައެއް މެމްބަރުން ވެސް ހާޒިރުކޮށް ސުވާލުކޮށްފައިވެ އެވެ.

ޕްރޮސިކިއުޓާ ޖެނަރަލް ހުސެއިން ޝަމީމް މީގެ ކުރިން މައުލޫމާތު ދެއްވާފައިވާ ގޮތުން މި މައްސަލާގައި ނިހާންގެ ރޮލެކްސް ގަޑިއަކާއި ލަކްޒަރީ އެޕާޓްމެންޓެއް ނަގައިދޭން ވަނީ އެދިފަ އެވެ. ނިހާން މިހާރު ވެސް ދިރިއުޅުއްވަނީ ހުޅުމާލޭގައި ހުންނަ އެޕާޓްމެންޓްގަ އެވެ.

އެމްއެމްޕީއާރްސީގެ ކޮރަޕްޝަންގެ ތުހުމަތު އޭރުގެ ސިޔާސީ ގޮތުން ނުފޫޒުގަދަ ނިހާންގެ މައްޗަށް ކުރެވޭއިރު އޭނާގެ ޕާސްޕޯޓް ވެސް ވަނީ ހިފަހައްޓާފަ އެވެ.

ނިހާންގެ މައްޗަށް ދައުވާ އުފުލައި، ޕީޖީ އޮފީހުން ނެރުނު ބަޔާނުގައި ބުނި ގޮތުގައި ވިލިމާލެ ދާއިރާގެ މެންބަރުކަމުގައި އަދި މާލިއްޔަތު ކޮމެޓީގެ މުގައްރިރުގެ މަގާމުގައި ހުރިއިރު، ކުރީގެ ނައިބު ރައީސް އަހުމަދު އަދީބުގެ އަރިހު ރިޝްވަތަށް އެދި، ރިޝްވަތު ގަބޫލުކޮށްފައިވެ އެވެ. އަދި، ނިހާންއަށް ލިބިފައިވާ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019 އާ ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައި ނުވާކަން ވެސް ޕީޖީ އޮފީހުން ފާހަގަކޮށްފައިވެ އެވެ.

މިހާރު ޖުމްހޫރީ ޕާޓީގެ އާންމު މެންބަރެއްގެ ގޮތުގައި ހުންނެވި ނިހާން ވަނީ އޭނާގެ މައްޗަށް ކުރެވޭ ހިޔާނާތުގެ ތުހުމަތުތައް ދޮގު ކުރައްވާފަ އެވެ.