އިސްލާމީ މަރުކަޒުގައި މިރޭ މަޣްރިބް ނަމާދު ކުރަމުންދަނިކޮށް އިމާމު ކުރިމައްޗަށް ހުއްޓި ކުޑަކަމު ދިޔައީ ނުކުޅެދުންތެރިކަން ހުންނަ މީހެއް ކަމަށް ފުލުހުން ބުނެފި އެވެ.

މި ހަބަރު ސޯޝަލް މީޑިއާގައި ދައުރުވާން ފެށުމުން ފުލުހުން މީޑިއާއަށް މައުލޫމާތު ދެމުން ބުނީ މިހާރު އެ މައްސަލަ ބަލަމުންދާ ކަމަށެވެ.

އިސްލާމީ މަރުކަޒުގެ އިތުރުން ރައީސް އޮފީހުގެ ގޭޓް ކުރިމައްޗަށާއި، ހުކުރު މިސްކިތް ތެރެއަށް ވެސް އެ މީހާ ކުޑަކަމުދިޔަ ކަމަށް މައުލޫމާތު ލިބިފައިވާ ކަމަށް ފުލުހުން ބުންޏެވެ.

ފަހަކަށް އައިސް އިސްލާމްދީނަށް ފުރައްސާރަކޮށް މިސްކިތްތަކުގެ ހުރުމަތްކަނޑާ މިސްކިތްތެރޭގައި ކައި ބޮއި ފާހިޝް އަމަލުތައް ހިންގާ ކަމުގެ މައްސަލަތައް ކުރިމަތިވަމުންދިޔަ ނަމަވެސް މިކަންކަން ސީރިއަސް މައްސަލަތަކެއްގެ ގޮތުގައި ނުބަލާތީ ރައްޔިތުންދަނީ ކަންބޮޑުވުން ފާޅުކުރަމުންނެވެ. މިކަންކަން ހިނގަމުންދާއިރު ރާއްޖޭގެ އިސްލާމިކް މިނިސްޓްރީން ވެސް މާބޮޑު އަޅާލުމެއްނެތް ކަމަށް ރައްޔިތުން ފާހަގަކުރެ އެވެ.