ޓޯކިޔޯ (05 އޮކްޓޯބަރު) - ޖަޕާނުގެ އާ ބޮޑުވަޒީރު ފުމިއޯ ކިޝިޑާ މަގާމާ ހަވާލުވުމަށްފަހު ކުރިމަތިލައްވަން ޖެހޭ ގިނަ ގޮންޖެހުންތަކެއް އެބަހުރި ކަމަށް މަޝްރަހު ދިރާސާކުރާ ފަރާތްތަކުން ބުނެފި އެވެ.

ވެރިކަން ކުރާ ލިބަރަލް ޑިމޮކްރެޓިކް ޕާޓީގެ ފަރާތުން މިދިޔަ ހަފްތާގެ ތެރޭގައި ބޮޑުވަޒީރުގެ މަގާމަށް އައްޔަން ކުރި ކިޝިޑާ މަގާމާ ހަވާލުވުމަށް ތައްޔާރުވަމުން އަންނައިރު، ގައުމު އޮތީ ނާޒުކު ފައްތަރެއްގައި ކަމަށް މާހިރުން ބުނެ އެވެ.

އެގޮތުން ކިޝިޑާއަށް އެންމެ ފުރަތަމަ ކުރިމަތިލާން ޖެހޭނެ އެއް ކަމަކީ ކޮވިޑް-19ގެ ޕެންޑެމިކާ އެވެ. ޖަޕާނުގައި ކޮވިޑް ފެންނަ މިންވަރު އިތުރުވަމުންދާއިރު، މިކަމާ ގުޅޭ ސިޔާސަތުތައް ހެދުމަކީ ކިޝިޑާ އެންމެ އިސްކަމެއް ދީގެން ކުރައްވާނެ ކަމަށް ލަފާ ކުރެވޭ ކަމެވެ.

އޭގެ އިތުރުން ކޮވިޑާއެކު އެ ގައުމެށް ކުރިމަތިވެފައިވާ އިގްތިސާދީ ހީނަރުކަމަކީ ވެސް ކިޝިޑާއަށް ކުރިމަތިވެފައިވާ ބޮޑު ގޮންޖެހުމެކެވެ. ގައުމީ އުފެއްދުންތެރިކަން އިތުރު ކުރުމާއި ވަޒީފާގެ ފުރުސަތުތައް އުފެއްދުމުގެ އިތުރުން ވިޔަފާރިތަކަށް ކުރިމަތިވެފައިވާ ދަތިތައް ހައްލު ކުރުމަކީ ކިޝިޑާގެ ޕްލޭންގައި ހުންނަން ޖެހޭ ކަންކަމެވެ.

މި ގޮންޖެހުންތަކާއެކު އޭނާގެ ކެބިނެޓް އެކުލަވާލުމުގައި ޓެކްނިކަލް ލަފާ ދެވޭނެ ފަރާތްތައް ހިމަނާނެ ކަމަށް މަޝްރަހު ދިރާސާކުރާ ފަރާތްތަކުން ލަފާ ކުރެ އެވެ.

މީގެ ކުރިން މާލީ ވަޒީރެއްގެ ގޮތުގައި ސަރުކާރަށް ހިދުމަތް ކޮށްދީފައިވާ އުމުރުން 64 އަހަރުގެ ކިޝިޑާ ބޮޑުވަޒީރުގެ މަގާމާ ރަސްމީކޮށް ހަވާލުވެ ވަޑައިގަންނަވާނީ ގާނޫނު ހަދާ މަޖިލީހުން އޭނާ އެ މަގާމަށް އައްޔަން ކުރަން ނަގާ ވޯޓަކަށް ފަހު އެވެ. – އަލް އަރަބިއްޔާ