ޔޫކްރެއިންގެ ވެރިރަށް ރަޝިއާ ސިފައިން ވަށާލައިފި، ބޭރަށް ނުކުމެވޭނެ ހުރިހާ ދޮރެއް ބަންދު

ކީވް (ފެބްރުއަރީ 27) - ޔޫކްރެއިންގެ ވެރިރަށް ކީވް ރަޝިއާ ސިފައިން ވަށާލައި، ބޭރަށް ނުކުމެވޭނެ ހުރިހާ ދޮރެއް ބަންދުކޮށްފި އެވެ.

ރަޝިއާގެ ސިފައިން ޔޫކްރެއިންގެ ވެރިރަށް ކިއެވްއާ ކައިރިވަމުން އަންނައިރު، ކިޔޭވްގެ މޭޔަރު ވަނީ އޭނާގެ ރައްޔިތުންގެ ރޫހާމެދު ފަޚުރުވެރިވި ނަމަވެސް، އެ މީހުންނަށް ރަޝިއާ ސިފައިން ހިފަހައްޓޭނީ ކިހާ މުއްދަތަކަށް ކަމާމެދު ކަންބޮޑުވުންފާޅުކޮށްފަ އެވެ.

އާދީއްތަ ދުވަހު އެސޯސިއޭޓެޑް ޕްރެސްއަށް ދެއްވި އިންޓަވިއުއެއްގައި، ރަޝިޔާގެ އަސްކަރިއްޔާއިން ކިޔޭވް ހިފުމަށް މަސައްކަތް ކޮށްފިނަމަ އާންމުން ހުސްކުރުމުގެ ވިސްނުމެއް އެބައޮތްތޯ ސުވާލު ކުރުމުން މޭޔަރު ވިޓާލީ އިރުކޮޅަކު ހިމޭނުން ހުންނެވި އެވެ.

"އަހަންނަށް އެކަމެއް ނުކުރެވޭނެ، ހުރިހާ ކޮޅެއް ވެސް ވަނީ ބަންދުވެފައި،" އޭނާ އެންމެ ފަހުން ބުންޏެވެ. "މިވަގުތު އެ މީހުން ތިބީ އަހަރެމެން ވަށާލައިގެން."

ބުރާސްފަތި ދުވަހު ރަޝިޔާ ސިފައިން ޔޫކްރެއިންއަށް އެރިއިރު، 2.8 މިލިއަން މީހުންގެ ސިޓީއިން ފުރަތަމަ ކުރިމަތިލީ ކަންބޮޑުވުމާ އެކު ނަމަވެސް، ތިބީ އަމިއްލަ ދިފާއުގައި ނުކުންނަން ތައްޔާރަށް ކަމަށް ބުނެފައިވެ އެވެ. ނަމަވެސް ތަރުކާރީ ވިއްކާ ފިހާރަތައް ބަންދުކުރަން ފެށުމާއެކު ނުތަނަވަސްކަން އުފެދެން ފެށި ކަމަށާއި އެ ސިޓީގެ މަޝްހޫރު ސަބްވޭ ސިސްޓަމް އެ ސިޓީގެ ބޮމުގެ ހިޔާތަކަށް ބަދަލުވި އެވެ.

މޭޔަރު އޭޕީއަށް ކަށަވަރުކޮށްދެއްވި ގޮތުގައި ކިޔޭވްގައި މިހާތަނަށް އާންމުންގެ ނުވަ މީހަކު މަރާލާފައިވާއިރު އޭގެ ތެރޭގައި އެއް ކުއްޖަކު ވެސް ހިމެނެ އެވެ.

މޭޔަރު ވިޓާލީ ކާފިއު ގަޑި ހަމަޖައްސާފައި ވަނީ ހޮނިހިރު ދުވަހުގެ ހެނދުނު 8:00 އާ ހަމައަށެވެ. މޭޔަރުގެ އަމުރުގައި ވަނީ ބޭރުގައި ހުއްދަ ނޫން އެއްވެސް މީހަކީ ހަމަނުޖެހުން އުފައްދަން އުޅޭ މީހެއް ކަމަށް ބެލެވިދާނެ ކަމަށެވެ.

"އަހަރެމެން މި މީހުން ހޯދަނީ އަދި މަގުމަތީގައި އެއްވެސް މީހަކު ނެތް ނަމަ ވަރަށް ފަސޭހަވާނެ،" ހޮނިހިރު ދުވަހުގެ ރޭ ރަޝިއާގެ ހަ "ސިފައިން" މަރާލާފައިވާ ކަމަށް ކްލިސިޗް ޗް ތަފްސީލުކޮށްދެއްވި އެވެ.

އަސްކަރީ ގިނަ ތަޖުރިބާކާރުން ލަފާކުރި ވަރަށް ވުރެ ރަޝިއާ ސިފައިން އެ ސިޓީގައި ވަނީ ކުރި އަރައިފަ އެވެ.

"އަޅުގަނޑު ރައީސް (ވޮލޮޑިމީރް ޒެލެންސްކީ) އާ ވާހަކަ ދެއްކިން. މީހުން ތިބީ ވަރަށް ބޮޑަށް މާޔޫސްވެފައި. ސަރުކާރުގެ މުވައްޒަފުން ތިބީ ޝޮކެއްގައި ނަމަވެސް މާޔޫސްކަމެއް ގައެއް ނޫން،" އޭނާ ވިދާޅުވި އެވެ. -- އޭޕީ