އެޗްބީއޯއިން ގެނެސްދިން ކާމިޔާބު ސީރީޒް "ގޭމް އޮފް ތުރޯންސް" ގެ ލީޑު އެއް ކެރެކްޓާ ކަމަށްވާ ޖޮން ސްނޯގެ ކެރެކްޓާއަށް ބިނާކޮށް އާ ސީރީޒެއް އުފެއްދުމުގެ މަސައްކަތް ފަށައިފި އެވެ.

ހޮލީވުޑް ހަބަރުތައް ގެނެސްދޭ މިޑިއާތަކުގައި ރިޕޯޓްކޮށްފައި ވަނީ އެޗްބީއޯގެ ހިޓް ފެންޓަސީ ޑްރާމާ "ގޭމް އޮފް ތުރޯންސް"ގެ ސީކުއެލްއެއް އުފެއްދުމުގެ މަސައްކަތް މިހާރު ފަށައިގެން ކުރަމުން އަންނަ ކަމަށެވެ. އަދި އިނގިރޭސި އެކްޓަރު ކިޓް ހެރިންޓަން ކުޅުނު ވަރުގަދަ ކެރެކްޓާ އިން ކުރިފަޅުވައިގެން ހަދާ ސީރީޒްގައި ވެސް އޭނަ އެ ރޯލު ފެނިގެންދާނެ އެވެ.

އިނގިރޭސި އެކްޓަރު ކިޓް ހެރިންޓަން އަލުން ކުޅެން ހަމަޖެހިފައިވަނީ އުތުރުގެ ދުނިޔޭގެ އެންމެ ފޭވަރިޓް ބާސްޓަޑް އަޔަން ތްރޯންގެ ވާރިސަށް ބަދަލުވެގެންނެވެ.

ލައިވް އެކްޝަން ސްޕިން އޮފް ސީރީޒެއް ފެށިގެންދާނީ ދިހަ އަހަރަށް ފަހު 2019 ވަނަ އަހަރު ނިމުނު "ގޭމް އޮފް ތްރޯންސް" ނިމުނު ހިސާބުންނެވެ.

އެކަމަކު މި ސީރީޒާ ބެހޭ ގޮތުން ރަސްމީކޮށް އޭގެ ޓީމުން އަދި އެއްވެސް ވާހަކައެއް ނުދައްކަ އެވެ.

ޖޮން ސްނޯ ކެރެކްޓާ އިން ކުރިފަޅުވައިގެން ވާހަކަ އިތުރަށް ކިޔައިދިނުމަށް ނިންމާފައިވާއިރު "ގޭމް އޮތް ތުރޯންސް" ގައި ކިޔައިދިން ހާދިސާތަކުގެ 300 އަހަރު ކުރިން ޓަގޭރިއަންގެ ދިރިއުޅުން އޮތް ގޮތް ދައްކުވައިދޭ އާ ސީރީޒެއް "ހައުސް އޮފް ޑްރެގަން" ގެ ނަމުގައި އަންނަ އޮގަސްޓް މަހު 21 ގައި އެޗްބީއޯ މެކްސް އިން ޕްރީމިއާކުރަން ހަމަޖެހިފައިވެ އެވެ. މީގެ ވާހަކަ ބިނާކޮށްފައި ވަނީ "ގޭމް އޮފް ތުރޯންސް" ވެސް ލިޔުނު އާރްއާރް މާޓިންގެ 2018 ގެ ވާހަކަ "ފަޔާ އެންޑް ބްލަޑް" އަށެވެ.

ޖޮން ސްނޯގެ ވާހަކަ އަލުން ދިރުވަން ތައްޔާރީތައް ވަމުން އަންނަ އިރު ހެރިންޓަން، 35، އެންމެ ފަހުން ފެނިފައި ވަނީ މިދިޔަ އަހަރު ރިލީޒްކުރި މާވެލް ސްޓޫޑިއޯސްގެ ސުޕަހީރޯ ފިލްމު "އެޓާނަލްސް" އިންނެވެ.