ކޮންމެ އަހަރެއްގެ ވެސް ބޮޑު އީދާ ދިމާކޮށް ރާއްޖޭގެ އެކި ސަރަހައްދުތަކުގައި ތަފާތު ކުޅިވަރު ހަރަކާތްތައް ކުރިއަށް ދެ އެވެ. މި ކުޅިވަރުތަކުގެ ތެރެއިން ފަހަކަށް އައިސް އެންމެ ގިނަ ބަޔަކު އިންތިޒާރުކުރާ އެއް ކަމަކީ ހދ. ކުޅުދުއްފުށީގައި ބާއްވާ މަށި މާލި ޕެރޭޑެވެ. އެއީ ސަބަބެއް ނެތިއެއް ވެސް ނޫނެވެ.

މާލި ޕެރޭޑަކީ ވަރަށް ހުނަރުވެރި މަސައްކަތެކެވެ. ގިނަ މެސެޖްތަކެއް ފޯރުކޮށްދޭ އެއްޗެކެވެ. ގައުމުގައި އެ ދުވަސްވަރު ހިނގާ އެންމެ ގިނަ ބަޔަކު އެ ވާހަކަތައް ދައްކާ ކަންކަން ވަރަށް "ސަޅިކޮށް" ގެނެސްދޭ ޕެރޭޑެކެވެ. ސަރުކާރަށް ދޭން ބޭނުންވާ މެސެޖުތަކާއި ރައްޔިތުން ނުރުހޭ ކަންކަން ވެސް މި ޕެރޭޑް ބަލާލުމުން އެނގެ އެވެ.

މިފަހަރު ވެސް ވަރަށް އާދަޔާ ހިލާފު ހުނަރުތައް މި ޕެރޭޑުން ފެނިގެން ދިޔަ އެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

މައިގަނޑު ގޮތެއްގައި މިފަހަރުގެ ޕެރޭޑުން އާއްމުން އިންތިޒާރު ކުރީ ދާދިފަހުން އެއް ޖިންސުން ގުޅުން ހިންގާ ވީޑިއޯތަކާ ގުޅިގެން މި ޕެރޭޑުން އެކަން ފެންނާނެ ކަމަށެވެ. ކަންވީ ވެސް އެހެންނެވެ.

އާންމުންގެ ސަމާލުކަން އެންމެ ބޮޑަށް ލިބުނީ އެ ކަމާ ގުޅިގެން ހަދާފައިވާ "އެ ކޮޓަރިކޮޅު"ގެ ފްލޯޓަށެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

"ބިޒްނަސް މީޓިން ރޫމް"ގެ ނަން ލިޔެ ތައްޔާރު ކޮށްފައިވާ ފްލޯޓެއް ވެސް އޭގެ ތެރޭގައި ހިމެނުނެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

އަދި އެހެން ފްލޯޓެއްގައި "ގިރި ހަވާދު"ގެ ނަމުގައި ވެސް އެ ކޮޓަރި ދައްކާފައިވެ އެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

ސަރުކާރުން ވައުދު ނުފުއްދޭތީ އާއި ކުޅުދުއްފުށީ އެއާޕޯޓާ ގުޅުންހުރި ފްލޯޓްތައް ވެސް ހަދާފައިވެ އެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް
ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

މީގެ އިތުރުން ދާދި ފަހުން ބޭއްވި ޔޯގާ އިވެންޓާ ގުޅޭ ފްލޯޓެއް ވެސް ހަދާފައިވެ އެވެ.

ކުޅުދުއްފުށީ މަށިމާލި ޕެރޭޑް ފޮޓޯ: އައިވެލް ޕޯޓްރެއިޓް

ކޮންމެއަކަސް މިއަހަރު ވެސް ކުޅުދުއްފުށިން ބޭއްވި ހަރަކާތުން ގިނަ ބަޔަކު ހެއްވާލައިފި އެވެ. މަޖާ ގޮތަކަށް ނަމަވެސް ގެނެސްދީފައި ވަނީ މިއަދު މުޖްތަމައުގައި ހުރި ކަންބޮޑުވާފަދަ ކަންކަމެވެ. މަށި މާލި ޕެރޭޑަށް ހަމަ ސާބަހެވެ.