އިންޑިއާގެ މަޝްހޫރު ކޮމޭޑިއަން އަދި އެކްޓަރު ރާޖޫ ސްރިވަސްތަވާއަށް ހާޓް އެޓޭކެއް ޖެހިގެން ވެންޓިލޭޓަރުގައި ފަރުވާ ދެމުން އަންނަތާ 15 ދުވަސް ފަހު ހޭއަރައިފި އެވެ.

ނިއުދިއްލީގެ އޭއައިއައިއެމްއެސް ހޮސްޕިޓަލުގައި ރާޖޫ އަށް ފަރުވާދޭ ފަށާފައި ވަނީ މިމަހުގެ 10 ވަނަ ދުވަހު އެވެ. އެއީ އޭނާ ޖިމަށް ގޮސް އުޅެނިކޮށް ހާޓް އެޓޭކެއް ޖެހިގެންނެވެ.

ރާޖޫގެ އާއިލާއިން ބުނީ 15 ދުވަހަށް ފަހު އޭނާ މިއަދު ހޭ އަރާފައިވާ ކަމަށެވެ. އަދި މިހާރު ރާޖޫގެ ހާލު ރަގަޅުވަމުން އަންނަ ކަމަށްވެސް ރިޕޯޓްތައް ބުނެ އެވެ. އެހެންނަމަވެސް ޑޮކްޓަރުން އަދިވެސް ރާޖޫގެ ސިއްހީ ހާލަތު ކައިރިން ބަލަމުން އަންނަ ކަމަށް ވެސް ރިޕޯޓްތައް ބުނެ އެވެ.

ރިޕޯޓުތައް ބުނާގޮތުގައި އުމުރުން 58 އަހަރުގެ ރާޖޫއަށް ހާޓްއެޓޭކް ޖެހުމުން ދެ ފަހަރު ސީޕީއާރު ދޭން ޖެހުނެވެ. އަދި ސިކުނޑި ވެސް ހުއްޓުނެވެ.

އޭނާ ސްޓޭންޑް އަޕް ކޮމެޑީގެ ގޮތުގައި މަޝްހޫރު ވެގެންދިޔައީ "ދަ ގްރޭޓް އިންޑިއަން ލާފުޓާ ޗެންޖް" އިންނެވެ.

އޭނާ ކުޅެފައިވާ ފިލްމުތަކުގެ ތެރޭގައި "ބާޒިގަރު، "ބޮމްބޭ ޓު ގޯއާ" ހިމެނެ އެވެ.

ރާޖޫއަކީ މިހާރު އުއްތަރު ޕްރަދޭޝްގެ ފިލްމް ޑިވެލޮޕްމަންޓް ކައުންސިލްގެ ޗެއާމަން އެވެ.