އިންޑިއާގެ މަޝްހޫރު ލަވަކިޔުންތެރިޔާ އަދިތުޔާ ނާރާޔަން އާއިލާ އެކު ޗުއްޓީ ހޭދަކުރުމަށް ރާއްޖެ އަތުވެއްޖެ އެވެ.

އަދިތުޔާ މިފަހަރު ޗުއްޓީ ހޭދަކުރުމަށް ރާއްޖެ އައިސްފައިވަނީ އޭނާގެ އަންހެނުން ޝްވެތާ އަގަރަވާލް އާއި އޭނާގެ ދަރިފުޅު ގޮވައިގެންނެވެ.

މި އާއިލީ ޗުއްޓީގައި ނަގާފައިވާ ފޮޓޯތަކާއި ވީޑިއޯތައް އެ މީހުން ވަނީ އިންސްޓަގްރާމުގައި އާންމުކޮށްފަ އެވެ.

އަދިތުޔާ އޭނާގެ އިންސްޓަގްރާމުގައި އާންމުކުރި ޕޯސްޓެއްގައި ބުނީ ދަރިފުޅުގެ ޕާސްޕޯޓް ހެއްދުމަށް ފަހު އޭނާ ގޮވައިގެން އެންމެ ފުރަތަމަ ދަތުރުކުރި މަންޒިލަކީ ވެސް ރާއްޖެ ކަމަށެވެ.

އެމީހުން ޗުއްޓީ ހޭދަކުރަމުން އަންނަނީ ބެގްލިއޯނީ ރިސޯޓުގަ އެވެ.

އަދިތުޔާ ނާރާޔަން އޭނާގެ އަންހެނުންނާއި ދަރިފުޅާއެކު

ލަވަކިޔުންތެރިއެއްގެ ގޮތުގައި އޭނާ ފާހަގަކުރެވުނަސް "އިންޑިއަން އައިޑޮލް" ކަހަލަ ބޮޑެތި ޝޯތައް ވަނީ ހޯސްޓްކޮށްފަ އެވެ.

ދިހަ އަހަރު ރައްޓެހިވެގެން އުޅުމަށް ފަހު އަދިތުޔާ އާއި ޝްވެތާ އަގަރަވާލް ކައިވެނިކުރީ 2020 ގަ އެވެ. މީގެ ހަ މަސް ކުރިން އެ މީހުންނަށް އަލަތު ދަރިފުޅު ލިބިފައިވާއިރު މިއީ އެ ކުއްޖާ ގޮވައިގެން ރާއްޖެއަށް އައި ފުރަތަމަ ފަހަރެވެ.