ބޮލީވުޑް ފިލްމުތަކާއި ޑްރާމާ ސިލްސިލާތަކެއް ކުޅެފައިވާ އެކްޓަރު އަރުން ބާލީ މަރުވެއްޖެ އެވެ.

ދިވެހިން މެދުގައިވެސް މަގުބޫލު ކަމެއް ހޯދާފައިވާ އިންޑިއާގެ ސިލްސިލާ "ކުމްކުމް" ގައި ރޯލެއް ކުޅުނު އެކްޓަރު އަރުން 79 އަހަރުގައި މަރުވީ ކަށީގެ ބައްޔަކާ ގުޅިގެންނެވެ. އަރޫންގެ މަރާ ގުޅިގެން ވަރަށް ގިނަ ބަޔަކު މިހާރު ހިތާމަ ފާޅުކުރަމުން އަންނަ އިރު، އޭނަގެ ޖަނާޒާ ބާއްވަން ހަމަޖެހިފައި ވަނީ މިއަދު އެވެ.

އަރޫންގެ އެންމެ ފަހުގެ ފިލްމަކީ އިއްޔެ ރިލީޒްކުރި އަމީތާބް ބައްޗަނާއި ރަޝްމިކާ މަންދަނާގެ "ގުޑްބާއީ" އެވެ. އަރުން ފެނިފައިވާ އިތުރު ފިލްމުތަކުގެ ތެރޭގައި "ލާލް ސިންގް ޗައްޑާ" އިންނެވެ. އޭނަ މި ފަހުން ފެނިފައިވާ އިތުރު ފިލްމުތަކުގެ "3 އިޑިއަޓްސް"، "ޕީކޭ" "ކޭދަރުނާތު" އަދި "ޕާނިޕަތު" ހިމެނެ އެވެ.

އަރޫން ބާލީ މަޝްހޫރުވެފައިވަނީ 1991 ވަނަ އަހަރު ރިލީޒްކުރި ޓީވީ ޝޯ "ޗަނާކްޔާ"ގައި ކިންގް ޕޯރަސްގެ ރޯލުނެވެ.