މާދަމާ ބޭއްވުމަށް ހަމަޖެހިފައިވާ އެމްޑީޕީގެ ޕްރައިމަރީގައި ރައީސް ސޯލިހުގެ ފަޅިން ވޯޓަށް މަކަރު ހަދަން އުޅޭ ކަމަށް ރައީސް ނަޝީދުގެ ކެމްޕެއިން ޓީމުން ތުހުމަތު ކޮށްފި އެވެ.

ރައީސް ނަޝީދުގެ ކެމްޕެއިން އޮފީސް ހުންނަ ގ. ބޮޑުފެންވަޅު ގޭގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދުގެ ކެމްޕެއިން އެޖެންޓް ހަސަން ލަޠީފް ވިދާޅުވީ މާދަމާގެ އިންތިހާބު އޮޅުވާލުމަށް ރައީސް އިބްރާހިމް މުހައްމަދު ސޯލިހުގެ ޓީމުން ގިނަ ކަންކަން ރާވަމުން ދާ ކަމަށެވެ.

އެގޮތުން އެކަކު ލައްވާ ދެ ފަހަރަށް ވޯޓުލުމަށް މަސައްކަތް ކުރަމުން ދާ ކަމަށާއި އެގޮތުން މާލޭގައި ވޯޓުލުމަށް ފަހު، ކައިރީގައި ހުރި ރަށްތަކަށް ނިސްބަތްވާ މީހުން އެރަކަށް ގޮސް ވޯޓުލެވޭ ގޮތަށް ރާވަމުންދާ ކަމަށެވެ. އަދި އައްޑޫގައި ރައީސް ސޯލިހް ރޭ ބޭއްވި ޖަލްސާއަށް މާލެއިން ދިޔަ އެތަނުގެ ބައެއް ރައްޔިތުން އެނބުރި މާލެ އައުމަަށް ހަމަޖެހިފައިވަނީ މާދަމާ އައްޑޫގައި ވޯޓުލުމަށް ފަހު ކަމަށާއި މާލެ އައިސް މާލޭގައި ހުންނަ އައްޑޫ ފޮއްޓަށް ވެސް ވޯޓުލުމަށް ރާވާ ކަމަށްވެސް ވިދާޅުވި އެވެ.

ކުދި ރަށްތަކުގައި ބާކީ ހުންނަ ވޯޓް ކަރުދާސްތައް ވޯޓުލުމަށް ބޭނުން ކުރަން ނިންމާފައިވާ ކަމަށްވެސް ހަސަން ލަތީފް ތުހުމަތު ކުރެއްވި އެވެ.

ހަސަން ލަޔީފް ވިދާޅުވީ، މި އިންތިހާބު އިންސާފުވެރިކޮށް ކުރިއަށް ގެންދިޔުމަކީ، ޕްރައިމަރީ އިންތިޒާމް ކުރާ އިންތިހާބާ ބެހޭ ކޮމިޓީގެ މަސްއޫލިއްޔަތެއް ކަމަށެވެ. އަދި އިންތިހާބު އިންސާފުވެރިކޮށް ކުރިއަށް ގެންދިޔުމަށް ކުރަން ޖެހޭ ކަންކަން ކުރުމަށް އޭނާ އިލްތިމާސް ކުރެއްވި އެވެ.

އިންތިހާބުގައި މަކަރު ހެދުން ހުއްޓުވުމަށް ރައީސް ނަޝީދުގެ ޓީމުން ކަންތައްތަކެއް ރާވާފައިވާ ކަމަށްވެސް އޭނާ ވިދާޅުވި އެވެ.