އެމްޑީޕީގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހު ކާމިޔާބު ކުރައްވާފައިވާ ކަމަށް ރައީސް މުހައްމަދު ނަޝީދު އެންމެ ފަހުން ގަބޫލުކުރައްވައިފި އެވެ.

"އިންތިޚާބުގެ އޮޅުވާލުންތައް އެއްކިބާކޮށްފިނަމަ، ރައީސް ސޯލިހަށް ލިބުނު ކަމަށް ބުނާ ވަރަށް ގިނަ ވޯޓް އުނިވާނެ. އެހެނަސް އަޅުގަނޑު ލަފާ ކުރަނީ ވޯޓް ލީ ވޯޓާސް ލިސްޓަށް ބަލައިފިނަމަ ކުޑަ ފަރަގަކުން ރައީސް ސޯލިހު މޮޅުވާނެ ކަމަށް،" ރައީސް ނަޝީދު މިއަދު އެމްޑީޕީގެ ވަޓްސްއަޕް ގްރޫޕަކަށް ފޮނުވި މެސެޖެއްގައި ވިދާޅުވި އެވެ.

ރައީސް ނަޝީދު ވިދާޅުވީ "އަޅުގަނޑަށް ފެންނަނީ ރައީސް ސޯލިހާއެކު ގޮސް 2023 ރިޔާސީ އިންތިޚާބު އެމްޑީޕީއަށް ކާމިޔާބު ނުކުރެވޭނެ ކަމަށް" ކަމަށެވެ.

މިއީ މިދިޔަ ހޮނިހިރު ދުވަހު އޮތް އެމްޑީޕީގެ ރިޔާސީ ޕްރައިމަރީގެ ވަގުތީ ނަތީޖާ އިއުލާންކުރި ފަހުން ރައީސް ނަޝީދު "ރިއެކްޓް" ކުރެއްްވި ފުރަތަމަ ފަހަރެވެ.

ޕްރައިމަރީގެ ނަތީޖާ ދައްކާ ގޮތުން ރައީސް ސޯލިހަށް 24،566 ވޯޓު ލިބުނުއިރު، ރައީސް ނަޝީދަށް ލިބުނީ 15،641 ވޯޓެވެ.