ބޮލީވުޑްގެ ވެޓެރަން ދެ އެކްޓަރުން ކަމަށްވާ ދަރްމެންދްރާއާއި ހެމާ މާލިނީގެ ކައިވެންޏަށް 44 އަހަރު ފުރުން އެ ދެމީހުން ފާހަގަ ކޮށްފި އެވެ.

ކައިވެނީގެ އަހަރީ ދުވަހުގެ މުނާސަބަތުގައި ދަރްމެންދްރާއާއި ހެމާ ވަނީ އެމީހުންގެ އާއިލާއާއެކު ކުޑަ ހަފްލާއެއްގައި ބައިވެރިވެ ކޭކެއް ފަޅާފަ އެވެ.

އެމީހުންގެ ކައިވެނީގެ އުފަލުގައި ދަރިފުޅު އީޝާ ޑިއޯލް ވެސް ވަނީ އެމީހުންގެ ޅައިރުގެ ފޮޓޯއެއް ހިއްސާކޮށް ދުވަހުގެ ތަހުނިޔާ ކިޔާފަ އެވެ.

ދަރްމެންދްރާއާއި ހެމާއަކީ 1970 އާއި 80ގެ އަހަރުތަކުގައި ބޮލީވުޑުން ވިދާލި ދެ ތަރިންނެވެ. އެ ދެތަރިން އެކުގައި ވެސް ގިނަ ފިލްމުތަކަކުން ފެނިފައިވެ އެވެ. އޭގެ ތެރޭގައި "ޝޯލޭ" ފާހަގަކޮށްލެވެ އެވެ.

1980 ވަނަ އަހަރު ކައިވެނިކުރި ދަރްމެންދްރާއާއި ހެމާގެ ކައިވެންޏަށް ދެ ކުދިން ލިބުނެވެ. އެއީ އީޝާ ޑިއޯލްއާއި އަހާނާ ޑިއޯލު އެވެ.