ރާއްޖޭގެ ބޮޑު ބަޔަކަށް އުދަ އަރާނެ ކަމަށް ލަފާކޮށް، މޫސުމާ ބެހޭ ގައުމީ އިދާރާ އިން މިއަދު ވައިޓް އެލާޓް ނެރެފި އެވެ.

މެޓް އޮފީހުން ނެރުނު ވައިޓް އެލާޓްގައި ބުނީ މިއަދު މެންދުރު ފަހު 1:15 އާއި ހަވީރު 5:15 އާ ދެމެދުގައި ކ. އަތޮޅުން ފެށިގެން އައްޑޫގެ ރަށްތަކަށް އުދަ އަރާނެ ކަމަށް ލަފާ ކުރެވޭ ކަމަށެވެ.

މިއަދު ދިޔަވަރު އެންމެ ބޮޑުވާ ގަޑީގައި މެދު ރާއްޖެ ތެރޭގެ އަތޮޅުތަކަށް ލޮނުގަނޑު 2.8 ފޫޓަށް އުފުލޭނެ އެވެ. އަދި ދެކުނުގެ އަތޮޅުތަކަށް 3.2 ފޫޓަށް ލޮނުގަނޑު އުފުލޭނެ ކަމަށް ވަނީ ލަފާކޮށްފަ އެވެ.

މިދިޔަ ހަފްތާގެ ތެރޭގައި ވެސް މާލޭގެ ރާޅުގަނޑު ސަރަހައްދުންނާއި މާލޭގެ ދެކުނު ފަރާތަށް ވަރަށް ބޮޑަށް އުދަ އެރި އެވެ.

މި ދުވަސްވަރަކީ އާންމުކޮށް ރާއްޖެ އަށް އުދަ އަރާ ދުވަސް ވަރެވެ.