ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާ ގުޅިގެން, އެ ގައުމުގައި ދިރިއުޅޭ އަދި އެގައުމަށް ދަތުރުކޮށްފައިވާ ދިވެހީންގެ ހާލު ރަނގަޅުކަމަށް ފޮރިން މިނިސްޓްރީން ބުނެފި އެވެ.

މިއަދު ނެރުނު ނޫސްބަޔާނެއްގައި ރާއްޖޭގެ ފޮރިން މިނިސްޓްރީން ބުނީ ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނުން އަންނަނީ ދިވެހީންގެ ހާލު ވަރަށް ގާތުން ބަލަމުންކަމަށެވެ. އެގޮތުން، ހައިކޮމިޝަނުގައި ރަޖިސްޓްރީވެފައިވާ 90 ދަރިވަރުންނާއި، އާއިލާތަކާއި އެކި ކަންކަމުގައި ބަންގްލަދޭޝްގައި ތިބި ދިވެހީންނަށް ގުޅައި، ހާލު ބަލައި، އެހީތެރިކަން ފޯރުކޮށްދެމުން ދާކަމަށެވެ.

މިވަގުތު ބަންގްލަދޭޝްގައި ތިބި ދިވެހީންގެ ހާލު ޖުމްލަގޮތައްގައި ރަނގަޅުކަމަށް ހައިކޮމިޝަނާ ހަވާލާދީ މިނިސްޓްރީން ބުންޏެވެ.

ބަންގްލަދޭޝްގެ އުތުރުގެ މެޑިކަލް ސްކޫލެއް ވަނީ ބަންދުކޮށްފަ އެވެ. އެހެންވެ އެ ސްކޫލްގައި ކިޔަވަމުންދާ ދެ ދަރިވަރަކު އެނބުރި ރާއްޖެ އަންނަން ބޭނުންވާތީ ހައި ކޮމިޝަނުން ވަނީ އެހީތެރިކަން ފޯރުކޮށްދީފަ އެވެ. އެ ދަރިވަރުން ވަނީ ބަހުގައި ބަންގްލަދޭޝްގެ ބޯޑަރު ހުރަސްކޮށްފަ އެވެ.

މިވަގުތު ބަންގްލަދޭޝްގައި ކާފިއު އިއުލާން ކޮށްފައިވުމުން، އެ ގައުމުގެ ސަރުކާރުން އިރުޝާދު ދީފައިވާ ގޮތަށް ބޭރަށް ނުކުމެނޫޅުމަށާއި ބަންގްލަދޭޝް ސަރުކާރާއި ބަންގްލަދޭޝްގައި ހުންނަ ރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް މިމިނިސްޓްރީން ވަނީ ތަކުރާރުކޮށް އިލްތިމާސް ކޮށްފަ އެވެ.

ބަންގްލަދޭޝްގައި ހިނގަމުންދާ ހަމަނުޖެހުންތަކާ ގުޅިގެން އެއްވެސް އެހީތެރިކަމެއް ބޭނުންވާނަމަ ބަންގްލަދޭޝްގައި ހުންނަ ރާއްޖޭގެ ހައިކޮމިޝަނާ ގުޅުމަށް ފޮރިން މިނިސްޓްރީން އެދެ އެވެ.

އިތުރު މައުލޫމާތު ބޭނުންވާނަމަ ފޮރިން މިނިސްޓްރީގެ ހޮޓްލައިން ނަންބަރު 7983400 އަށް ގުޅުމަށް އެ މިނިސްޓްރީން އެދެ އެވެ.