ހަމާސްގެ ޕޮލިޓިކަލް ބިއުރޯގެ ވެރިޔާ އިސްމާއިލް ހަނިއްޔާ އީރާނުގައި ހުންނަވަނިކޮށް ބުދަ ދުވަހުގެ ފަތިހު އަވަހާރަކޮށްލުމާ ގުޅިގެން ދިވެހި ސަރުކާރުން އެކަން ކުށްވެރިކޮށްފި އެވެ.

ފޮރިން މިނިސްޓްރީން ދެންމެ ނެރުނު ބަޔާނެއްގައި ބުނީ ބައިނަލްއަގްވާމީ ގާނޫނުތަކާއި ބައިނަލްއަގްވާމީ އިންސާނީ ގާނޫނުތައް ނަގަހައްޓައި، ޣައްޒާގެ މައްސަލައަށް އަވަސް އަދި ދެމެހެއްޓެނިވި ހައްލެއް ހޯދުމަށާއި، ސަރަހައްދުގެ ސުލްހަ މަސަލަސް ކަމާއި ހަމަޖެހުން ގާއިމުކުރުމަށް ހުރިހާ ގައުމުތަކަކުން ގުޅިގެން މަސައްކަތްކުރުމަށް ދިވެހި ސަރުކާރުން ގޮވާލާ ކަމަށެވެ.

ކުރު ބަޔާނަކުން ދިވެހި ސަރުކާރުން އިސްމާއިލް ހަނިއްޔާ އަވަހާރަކޮށްލުން ކުށްވެރިކޮށްފައި މިވަނީ އެ ހާދިސާ ހިނގިތާ 24 ގަޑިއިރު ފަހުން ނެވެ. އާއްމުން ވަނީ ސަރުކާރާއި ސަރުކާރުގެ އިސްވެރިން އެކަމާއި ގުޅޭގޮތުން ހަނު ތިއްބެވުމުން ފާޑު ކިޔައިފަ އެވެ. ފާހަގަކޮށްލެވޭ ގޮތުގައި އިސްލާމިކް މިނިސްޓަރު މުހައްމަދު ޝަހީމް އަލީ ޝައީދު ވެސް މިކަމުގައި އެއްވެސް ބަސްފުޅެއް ވިދާޅެއް ނުވެ އެވެ. ކުރީގެ އިސްލާމިކް މިނިސްޓަރު ޑރ. އަހުމަދު ޒާހިރު ވަނީ އެކަމާއި ގުޅިގެން ސަރުކާރަށް ފާޑު ވިދާޅުވެފަ އެވެ.